கிரிக்கெட் தொடர் பதிவு...

நர்சிம் என்னை இந்தத் தொடர்பதிவுக்கு அழைத்திருந்தார்.அவருக்கு என் நன்றி..

பதிவை ஆரம்பிக்கும் முன் உங்களுக்கு ஒரு சிறு புதிர்..


இந்த கிரிக்கெட் வீரர் நாற்பத்திரெண்டு ஓட்டங்கள் கொடுத்து ஆறு விக்கெட்டுகளை வீழ்த்தியதுடன்..நாற்பத்தேழு ஓட்டங்கள் எடுத்து தன் அணிக்கு வெற்றி வாய்ப்பை உருவாக்கினார்.அந்த மைதானத்தில் இதுவரை இவர் சாதனை முறிக்கப்படவில்லை..இனியும் முறிக்கப்படாது..அந்த வீரர் யார்? அந்த மைதானம் எது? இதற்கான விடை உங்களுக்குத் தெரிந்தால் நீங்கள் கிரிக்கெட் புலி என ஒப்புக் கொள்கிறேன்..விடை தெரியாதவர்களுக்கு பதிவின் முடிவில் விடை.

இனி தொடர் பதிவு..

1)பிடித்த கிரிக்கெட் வீரர்கள்- (சந்தேகமில்லாமல்) சச்சின் தான்,அடுத்து சந்தர்பால் சொல்லலாம்

2)பிடிக்காத கிரிக்கெட் வீரர் - மனோஜ் பிரபாகர், மியான்தாத்,ஹர்பஜன்

3)பிடித்த வேகப் பந்து வீச்சாளர்- கர்ட்னி வால்ஷ்

4)பிடிக்காத வேகப்பந்து வீச்சாளர்- யாருமில்லை

5)பிடித்த சுழல் பந்து வீச்சாளர்-அப்துல் காதர் ,ஷேன் வார்ன், முரளிதரன்

6)பிடிக்காத சுழல் பந்து வீச்சாளர்- மணிந்தர் சிங்

7)பிடித்த வலது கை துடுப்பாட்ட வீரர்- சச்சின்,ரிக்கி பாண்டிங், வெங்சர்கார்

8)பிடிக்காத வலது கை துடுப்பாட்ட வீரர்- மியான்தாத்

9)பிடித்த இடது கை துடுப்பாட்ட வீரர்- ஆலன் பார்டெர், வடேகர்

10)பிடிக்காத இடது கை துடுப்பாட்ட வீரர்-வினோத் காம்ப்ளி (திறமை இருந்தும்..நம்பிக்கையின்றி,முயற்சி யின்றி அழிந்தவர்)

11)பிடித்த களத்தடுப்பாளர்-ஒரே சமயம் அணியில் இருந்த அபீத் அலி, சோல்கார், வெங்கட் மற்றும் வடேகர்

12)பிடிக்காத களத்தடுப்பாளர்- பிரசன்னா

13)பிடித்த ஆல்ரவுண்டர்- சச்சின்,ஜெய சூர்யா, ரிச்சர்ட்ஸ்,லாரா

14)பிடித்த நடுவர்- ஆடும் அணியில் தங்களையும் ஒரு அணிக்கு ஆடுபவர் என எண்ணாத அனைத்து நடுவர்களும்

15)பிடிக்காத நடுவர்- ஆடும் அணியில் ஒரு அணியில் தங்களையும் அந்த அணி வீரர் என எண்ணுபவர்களை

16)பிடித்த நேர்முக வர்ணனையாளர்- இன்று ரவி சாஸ்திரி
அன்று ரேடியோ வர்ணனையாளர் ஆனந்த ராவ்..(ஆங்கிலத்தில்)(அப்போது ரேடியோவில் ஹிந்தி வர்ணனை வரும்போது..காஃபீ ஏக் ரன்..காஃபி தோ ரன் என்பார்

கள்..இவர்கள் எவ்வளவுதரம் காஃபி சாப்பிடுவார்கள் என எண்ணியதுண்டு :-)))

17)பிடிக்காத நேர்முக வர்ணனையாளர்- சித்து

18)பிடித்த அணி- இந்தியா என்று சொல்ல ஆசைதான்..இருந்தாலும்..அமைதி..ஸ்போர்ட்ஸ் மென்ஷிப் இவற்றை வைத்து வெஸ்ட் இண்டீஸ் பிடிக்கும்

19)பிடிக்காத அணி- ஆஸ்திரேலியா (காரணம் தேவையில்லை என எண்ணுகிறேன்)

20)விரும்பிப் பார்க்கும் அணிகளுக்கான போட்டி- ஸ்ரீலங்கா..இந்தியா

21)விரும்பாத அணிகளுக்கான போட்டி- கனடா..ஆஸ்திரேலியா

22)பிடித்த அணித்தலைவர்- ரிச்சர்ட்ஸ், வடேகர்

23)பிடிக்காத அணித்தலைவர்- ரிக்கி பாண்டிங்

24)பிடித்த போட்டிவகை- ஒன் டே மேட்ச்

25)பிடித்த ஆரம்ப துடுப்பாட்ட ஜோடி- கிரீனிட்ஜ் மற்றும் ஹைன்ஸ் (வெஸ்ட் இண்டீஸ்)

26)பிடிக்காத ஆரம்ப துடுப்பாட்ட ஜோடி- ரவிசாஸ்திரி.. மனோஜ் பிரபாகர் போன்றவர்கள் ரெகுலர் ஓபனர்ஸுடன் ஓபன் செய்து விரைவில் அவுட் ஆவது பிடிக்காது

27)சிறந்த டெஸ்ட் வீரர்- சச்ச்ன்,திராவிட்,லாரா

28)கிரிக்கெட் வாழ்நாள் சாதனையாளர்- கபில்தேவ்...சோபர்ஸ்..ரிச்சர்ட்ஸ்

ஒரு தகவல்-
1978ல் இந்தியா பாகிஸ்தானுக்குச் சென்ற போது ஒரு போட்டியில் இந்தியாவிற்கு எதிராக அமீன் லக்கானி இரு இன்னிங்ஸிலும் 'ஹாட்ரிக்' எடுத்தார்.இதில் என்ன சிறப்பு என்றால் ,இரு இன்னி
ங்ஸிலும் அவர், அதே ஆட்டக்காரர்களை வீழ்த்தினார்.அந்த ஆட்டக்காரர்கள் மொகிந்தர் (ஸ்கோர் 11 அண்ட் 12),கிர்மானி 0 & 0, கபில்தேவ் 0 & 0

முதலில் சொன்ன புதிருக்கான விடை - ஹி..ஹி..ஹி..அது நானே தான்.அம்பத்தூர் வெங்கடாபுரத்திற்கும் வரதராஜபுரத்திற்கும் இடையே நடந்த போட்டியில் என் சாதனை இது..அந்த சாதனையை யாரும் முறியடிக்க முடியாது அந்த மைதானத்தில்..ஏனெனில் அந்த மைதானம் இருந்த இடத்தில் கான்கிரீட் வீடுகள் வந்துவிட்டன.

அக்கினிக்குஞ்சும் ஆங்கோர் பொந்தும் (சிறுகதை) பாகம் - 3

(அகநாழிகையின் சிறுகதையின் தொடர்ச்சி..)

வாலிப, வயோதிக அன்பர்களே !

நாம் ஏற்கனவே படித்த ‘அக்கினிக்குஞ்சும் ஆங்கோர் பொந்தும்‘ கதையின் மூன்றாவது பாகத்தை தங்கள் முன் சமர்ப்பிப்பதில் பெருமகிழ்ச்சியடைகிறேன். நேற்று வெளியான முதல் பாகத்தைப் போலவே இரண்டாம் பாகத்தையும் வாசித்து மூன்றாவது பாகமும் பிடித்திருந்தால் பெருவாரியான ஓட்டளித்து இக்கதையை வெற்றிபெறச் செய்யுமாறு கேட்டுக் கொள்கிறேன். (என்னதான் இருந்தாலும் வரலாறு முக்கியம் அல்லவா..) மேலும் இவ்வாறாக செய்வதன் மூலம் இராமசாமி என்கிற ‘தீப்பொறி‘யின் எழுத்துலக வாழ்க்கையில் விளக்கேற்றும்படி கோடானுகோடி இரசிகப் பெருமக்கள் சார்பாக கேட்டுக்கொள்கிறேன்.

வெற்றி நடை போடுகிறது !
அக்கினிக்குஞ்சும் ஆங்கோர் பொந்தும் (சிறுகதை)

பாகம் - 3

ஒரு நாள் இராமசாமி..அலுவலகம் செல்கையில் நண்பன் கதிரேசனை பேருந்தில் சந்தித்தான்..அவன் தலைமைச் செயலகத்தில் வேலை செய்வதாகக் கூறினான்..

இராமசாமியை பார்க்க பரிதாபமாக இருந்தாலும்..அவன் மனதில் ஏதோ பாரம் இருப்பதைப் போல இருந்ததாலும்..'ஏன் இராமசாமி..என்னவாயிற்று உனக்கு?' என்றான் கதிரேசன்.

இராமசாமி தான் எழுத்தாளர் ஆன கதையையும்..புத்தகம் வெளிவந்ததையும்..பின் நடந்த விஷயங்கள் அனைத்தையும் அவனிடம் பகிர்ந்துக் கொண்டான்.

கதிரேசனும்..'அடடா..ஆமாம்..துரை கூட என்கிட்ட சொன்னான்..உன் புனை பெயர் கூட ஏதோ அரிசிப்பொரி...' என இழுத்தான்.

இராமசாமிக்கு..கோபம் சுர் ரென தலைக்கு ஏறியது.எழுத்தாளனுக்கான கர்வம் தலைதூக்கியது..'யாரைப் பார்த்து..அரிசிப்பொரி..என்கிறாய்..தீப்பொறி..' என்றான் .முண்டாசுக் கவியின் கோபப் பார்வைகளை படங்களில் பார்த்திருக்கிறானே..அதே போன்று கண்களை உருட்டி ..மிரட்டி..'என் புத்தகத்தின் பெயர் ..அக்கினிக் குஞ்சும் ஆங்கோர் பொந்தும்..'

ஆடிப்போன கதிரேசன்..'அப்படியா..கொஞ்சம் முயன்றால்..உன் புத்தகத்தை நூலகங்களுக்கு அனுப்பலாமே..தமிழக அரசு..இப்போவெல்லாம் ஆயிரம் பிரதிகள் நூலகங்களுக்கு வாங்குகிறதே' என்றதுடன் நில்லாது..'இன்னொரு புத்தகமும் தயாரித்துக் கொள்..இரண்டையும் சேர்த்து நூலக ஆர்டருக்கு முயற்சிப்போம் ஆனால்..என்ன..நாற்பது ரூபாய் புத்தகத்திற்கு..இருபது ரூபாய் போல்தான் விலை நிர்ணயிப்பார்கள்' என்றான்.

பரணில் தூங்கிக்கொண்டிருக்கும் புத்தகங்களுக்கு விடிவு காலம் வந்துவிட்டதாய் இராமசாமி நினைத்தான்.'சரி..கதிர்..இன்னும் ஒரே மாதத்தில் அடுத்த புத்தகம் தயாராய் இருக்கும்..புத்தகத்தின் பெயர் கூட தீர்மானித்து விட்டேன்.."வெந்து தணிந்தது காடு.." ' என்றான்.

அடடா..அருமையான தலைப்பு..என்றான் கதிர்.

மாலை வீடு திரும்பிய இராமசாமி..மீண்டும்..வெள்ளைத் தாள்..பேனா வுடன் அமர்ந்து விட்டான்.இவனுக்கு மீண்டும் என்னவாகிவிட்டது என மனைவி வியந்தாள்.

நடந்த விஷயங்களை கேள்விப்பட்ட துரை..கதிரிடம் " ஏண்டா இப்படி செஞ்சே..நூலக ஆர்டர் வருவது அவ்வளவு எளிதா?' என்றான்..

'அதெல்லாம் பகீரத பிரயத்னம்..ஆனானப்பட்ட பெரிய பதிப்பகங்களே..ஆர்டர் கிடைக்காது அவதிப் படுகின்றன..இராமசாமியைப் பார்க்க பாவமா இருந்தது..எழுத முடியா ஏக்கம் முகத்தில் தெரிந்தது..அதனால்தான் அப்படி சொன்னேன்' என்றான் கதிர்.

இராமசாமியோ..தனது புத்தகங்கள்..இரண்டாம் பதிப்பு..மூன்றாம் பதிப்பெல்லாம் வருவது போல கையில் வெற்றுத் தாளை வைத்துக்கொண்டு..விழித்தபடியே கனவு கண்டான்.

மேலும் ஆயிரம் புத்தகங்களை வைக்க பரணில் இடம் இருக்குமா..? என்பது அவன் மனைவியின் கவலை.

பூ வாசம்

நாக லிங்கப் பூவின்

மகரந்த வாசம்

பொன்வண்டாய் நான்

நாட்குறிப்பு பக்கங்களில்

மையின் வாசனை

நுகரா ஏடுகள்

வாசிக்கவும் யோசிக்கவும்

வசப்படாமல்

பொம்மையாய் மனம்

தூங்காதே விழித்திரு

தூரத்தே கேட்கும் குரல்

கண் விழிக்கையில்

அறை முழுதும்

நாகலிங்கப் பூவாசம்

இந்த பதிவு..யாரையும்..எந்நிகழ்ச்சியையும் குறிப்பிடுவன அல்ல..

வானமெங்கும் சூரியன்

மலைகள் மீது

நீர்க்கடல் மீது

தரையின் மீது

தருக்களின் மீது

சுட்டெரிக்கிறது

ஆயினும் அதை

மிரட்டவோ

முறைக்கவோ

மன்னிப்புக் கேட்க வைக்கவோ

மாநிலத்தவர்க்கு இயலாது.


2) சற்றே மாற்றப்பட்ட பாரதியின் வரிகள் சில...

இரண்டு பாம்புகள் பேசிக்கொள்கின்றன

முதல்பாம்பு- உன்னுடன் இருப்பதில் எனக்கு இன்பமில்லை.உன்னால் என் வாழ்வு விஷமாகிறது

இரண்டாம் பாம்பு-உன்னுடன் இருப்பதால் ..எனக்கும் இன்பமில்லை..உன்னால் என் மனம் வேதனை அடைகிறது

முதல்- நீ என்னிடம் மன்னிப்புக் கேட்க வேண்டும்

இரண்டாவது- நீதான் மன்னிப்புக் கேட்க வேண்டும்

முதல்- இனி நீ எனக்குப் பகை

இரண்டாவது-நீ என் விரோதி

முதல்-நான் உன்னை அழிக்கப் போகிறேன்

இரண்டாவது-நான் உன்னைக் கொல்லப் போகிறேன்

ஒன்றுடன் ஒன்று அடித்துக் கொண்டு மடிகின்றன..

சூரியனின் பிரகாச ஒளி அவற்றில் பட்டு பிரகாசிக்கிறது.

வாய் விட்டு சிரியுங்க..

1) அந்த டாக்டருக்கு வாஸ்து சாஸ்திரமும் தெரியும்னு எப்படி சொல்ற
நோயாளிக்கு ஆபரேஷன் செய்யறப்போ லிவர் இருக்கிற இடம் சரியில்லை அதை 'லங்க்ஸ்' கிட்ட மாத்திடணும்னு சொல்றாரே!!

2)நல்ல மழையில தலைவர் ஏன் பக்கத்தில இருக்கற பள்ளிக்கூடத்திற்குப் போகணும்னு சொல்றார்
யாரோ அவரை மழைக்குக் கூட பள்ளிக்கூட நிழல்ல ஒதுங்காதவர்னு சொல்லிட்டாங்களாம் அதனாலத்தான்

3)அந்த broadband நிறுவனம் முன்னால அவர் ஏன் உண்ணாவிரதம் இருக்கார்
ஆயிரம் ரூபாய்க்கு பில் வந்திருக்காம்..
அது அதிகம்னு சொல்றாரா
இல்லை அவர் வீட்ல அந்தக் கம்பெனியோட broadband இணைப்பேக் கிடையாதாம்.

4)அங்கே நடந்த கொள்ளைக்கு மோப்ப நாய்க்கு பதிலா போலீஸ் ஏன் எறும்புப் படையைக் கூட்டிட்டு வந்திருக்காங்க
கொள்ளைப் போனது பத்து மூட்டை சர்க்கரை..அதனால்தான்

5)அந்தக் கல்யாணம் ரயில்வே போர்ட்டர் வீட்டுக் கல்யாணம்னு எப்படி சொல்ற
முதல் பந்தியில சாப்பிட டவலைப் போட்டு இடம் பிடிச்சு அந்த இடத்தை அஞ்சு ரூபாய்க்கு விற்கிறாரே

6)டாக்டர் ஒரு மாசமா தூக்கமே இல்லை
இவ்வளவு நாள் என்ன செஞ்சீங்க...முதல்லயே வரதுக்கு என்ன
நீங்க பர்மனென்டா தூங்க வைச்சுட்டா என்ன பண்றதுன்னு தான் வரலே

இறைவன் ஒரு பச்சோந்தியா...

இறைவன் இருக்கின்றானா
இருந்தால்
அவன் நிறம் என்ன?
வினவினான் ஒருவன்
அவன் பச்சை நிறம்
மரம்,செடி,கொடி,புல்
அவன் நீல நிறம்
வானத்தைப் போல
அவன் பழுப்பு நிறம்
பாறை, மலையைப் போன்று
அவன் வெண்மை நிறம்
உச்சியிலிருந்து விழும் நீரானபோது
அவன் சிவப்பு நிறம்
கீழ் வானத்தில் சூரியன்
வந்திடும் போது
அவன் மஞ்சள் நிறம்
வெயில் சுட்டெரிக்கும் போது
சூரியன் மறைந்ததும்
அவன் நிறம் கருப்பு
வானவில்லாய் தோன்றும் போது
பல நிறங்கள்
என்றதும்
பேதை கேட்டான்
அப்போது அவன் ஒரு
பச்சோந்தியா என
அவன் செம்புலப்புயல் நீர்
என்றிட்டேன்.

(மீள்பதிவு)

அறியாமை

அறிவாளி என்றே

அவனைப் போற்றினேன்

பின்னரே தெரிந்தது

அறிவிலி அவனென்று


2)உயரே பறக்கையில்

பாராட்டிய உலகு

கீழே விழுகையில்

அன்றே தெரியும் என

எள்ளி நகைக்கிறது


3)கடவுள் அன்பானவர்னு

சொன்ன அப்பா

தப்பு செஞ்சா

கடவுள் கண்ணைக் குத்தும்னு

சொல்றாரே

இவர்களில் யார் நல்லவர்

யார் கெட்டவர்

அறியாமையில் சிறுவன்


4)கடல் நீரை

குடிநீராக்கி

மேகப் பைகளில்

நிரப்பி அனுப்புகிறது

இயற்கை நமக்காக


5)பேச்சுத் தமிழ்

எழுத்துத் தமிழ்

கவிதைத் தமிழ்

மேடைத் தமிழ்

இலக்கியத் தமிழ்

அனைத்தையும் விட

எனக்குப் பிடித்தது

நீ பேசும்

கொஞ்சும் தமிழ்

தேங்காய். மாங்காய்.. பட்டாணி.. சுண்டல்(19-2-10)

தாய்மையின் குழைவும், தந்தையின் பரிவும் பூமியின் பொறுமையும், பொறுப்புள்ள புன்னகையும், துணை வாடத் தான் வாடும் ஓருயிர் உணர்வும் எங்கே தோன்றுகிறதோ..அங்கே வாழ்வதுதான் காதல் - கண்ணதாசன்

2)குழந்தை பிறந்து மூன்று மாதங்களுக்குப் பிறகு தான் கண்ணீர் உற்பத்தியாகிறது.அதாவது tearducts .

3)நெப்போலியன் எகிப்தின் மீது படையெடுத்த போது ஃபோரே என்னும் இருபது வயது பெண் மீது காதல் வயப்பட்டு..அவளை பிரிய மனமின்றி..ராணுவ வீரன் போல அவளுக்கு உடையணிவித்து யுத்தகளத்திற்கு அழைத்துச் சென்றானாம்.நெப்போலியன் காதலித்த பெண்களின் எண்ணிக்கை ஐம்பதற்கும் மேல் ஆகும்.

4)இந்த வருடம் இப்போது நடைபெறும் ஃபெப்ரவரி மாதத்திற்கு ஒரு விசேஷம் உண்டு.அதாவது ஓன்றாம் தேதி..வார முதல் நாள் திங்களன்று ஆரம்பிப்பது போல வரும் மாதம்.இம்மாதம் எல்லாக் கிழமைகளும்..நான்கு..நான்கு வரும்..இது போல பதினோரு வருடங்களுக்கு ஒரு முறை வருமாம்.

5) அந்த பிரபல நடிகர் நடித்த முதல் படத்தில்..எந்தெந்த இடங்களில் அவர் சிறப்பாக நடிக்கவில்லை என நினைத்தார்களோ..அந்தக் காட்சிகளை..சுமார் ஆறாயிரம்..ஏழாயிரம் அடிகள் திரும்பவும் செட் போட்டு ஏ.வி.எம்., ஸ்டூடியோ விலும்..வெளியிலும் சுமார் இருபது நாட்கள் ஒரே மூச்சில் எடுத்து முடித்தார்கள்.அந்தப் படம் 'பராசக்தி' நடிகர் சிவாஜி கணேசன்.

6)ஒரு வருடத்திற்கு 34 முறைகள் மத்திய அமைச்சர்களின் குடும்பங்கள் இலவசமாக விமானப் பயணம் செய்யலாமாம்.

7) கொசுறு- ஒரு ஜோக்

தமிழ் அகராதியை வைத்துக் கொண்டு அமைச்சர் என்ன தேடிக்கொண்டிருக்கிறார்
தான் அடுத்து என்ன பட்டம் வாங்கலாம் என்று பெயர் தேடிக்கொண்டிருக்கிறார்

கொள்ளை..(ஒரு பக்கக் கதை)

காலை எழுந்ததும்..கையில் காஃபியுடன்..அன்றைய தினசரியை எனக்கு படித்து விட வேண்டும்..அப்போதுதானே..நம்மைச் சுற்றி நடக்கும் செய்திகளை நம்மால் அறிய முடியும்.

கடந்த சில நாட்களாக செய்தித்தாள்களில் நான் வசிக்கும் அசோக்நகர் பகுதியில் ..ஏதேனும் ஒரு இடத்தில் பட்டப் பகலில் கொலை..கொள்ளை என்றிருக்கிறது.நாடே கெட்டுப் போச்சு..

நான் நினைத்தது சரி....'அசோக் நகரில் நேற்றும் பகல் கொள்ளை' என்றது தலைப்புச் செய்தி.அதைப் பார்த்ததும்..உடன் மனைவையைக் கூப்பிட்டேன்..'பார்த்தியா..நேற்றுக் கூட நம்ம ஏரியாவிலே திருட்டுப் போயிருக்கு..' என்றவாறு ..அவள் கழுத்தில் அணிந்திருந்த கிட்டத்தட்ட பத்து பவுன் சங்கிலியைப் பார்த்தேன்.

'மேல படியுங்க' என்றாள்.

'அசோக் நகர்..18 ஆம் தெருவில் உள்ள சுபிக்க்ஷா அடுக்குமாடி குடியிருப்பில்..இரண்டாம் தளத்தில் உள்ளது 8 ஆம் எண் உள்ள..ஃப்ளாட்.அங்கு வசிக்கும் கந்தசாமி என்பவரும்..அவரது மனைவி லட்சுமியும் வேலைக்குச் செல்லும் தம்பதிகள்.அவர்கள் வீட்டை பூட்டிவிட்டு தினமும் வேலைக்குச் செல்வது வழக்கம்.நேற்றும்..அப்படிச் சென்று விட்டு மாலை வீடு திரும்பியவர்கள்..வீடு திறந்திருப்பதைப் பார்த்து..உள்ளே சென்று பார்த்த போது..பீரோவை உடைத்து 35 சவரன் நகைகள்..ஒரு லட்சம் ரொக்கம் கொள்ளையடிக்கப் பட்டிருந்தது கண்டுபிடிக்கப் பட்டது.போலீஸார் தீவிர விசாரணை செய்து வருகிறார்கள்'

படித்து முடித்து..'பார்த்தியா நாம ஜாக்கிரதையா இருக்கணும்' என்றேன்.

திடீரென ..'என்னங்க..நம்ம ஃப்ளாட்டும் 18ஆவது தெருதானே..' என்றாள் சகதர்மணி .

'சுபிக்க்ஷா' நம்ம ஃப்ளாட் தானே.'

'நம்ம வீட்டு நம்பர் 7..அப்போ 8..அடடே..நம்ம பக்கத்து வீடுங்க..' என்றாள் படபடப்பாக

சிறு பட்ஜெட் படங்களை விழுங்கும் தமிழ்ப்படங்கள்

2010ம் ஆண்டு பிறந்து 45 நாட்களுக்குள் சில நல்ல தமிழ்ப் படங்கள் வந்துள்ளன.ஆனாலும் அவை எதிர்ப்பார்த்த வெற்றியை அடையவில்லை.அவற்றிற்கு பல காரணங்கள் சொல்லப் பட்டாலும்..முக்கியக் காரணமாக நான் நினைப்பது திரையரங்கங்கள் பற்றாக்குறை.படங்கள் வரும் அளவிற்கு திரையிட அரங்குகள் இல்லை.

அந்த நாட்களில் படங்கள் வந்தாலும்..சென்னையை பொறுத்த மட்டில்..ஒரு படம் அதிக பட்சம் நான்கு அரங்குகளிலேயே வெளியாகும்..வெளியான நான்கு தியேட்டரிலும் நூறு நாட்கள் ஓடும்..அரங்கு நிறைந்த 100 காட்சிகள் என்றெல்லாம் விளம்பரம் வரும்.

ஆனால் இப்போதோ..பிரபல தயாரிப்பாளர்கள்..நடிகர்கள் படம் பல முக்கிய தியேட்டர்களைப் பிடித்துக் கொண்டுவிடுகின்றன.தவிர்த்து..திரைக்கு வந்து சில நாட்கள் தினமும்..மொத்தத் தியேட்டரிலும் நாளொன்றுக்கு 100 காட்சிகள் ஓடுகின்றன..அதாவது..படம் தோல்வியுற்றாலும்..மக்களிடமிருந்து..அதிக பட்சம் பணம் சில நாட்களில் கறந்து விடுகிறார்கள்.சமீபத்திய உதாரணங்கள்..கந்தசாமி,வேட்டைக்காரன்,ஆயிரத்தில் ஒருவன்,குட்டி ஆகியவற்றைச் சொல்லலாம். சமீபத்தில் வந்த அசல்,தீராத விளையாட்டுப் பிள்ளை ஆகியவை இப்போது கிட்டத்தட்ட 70 காட்சிகள் தினம் நடைபெறுகின்றன.

இந்தப் போக்கால்..மீடியம் பட்ஜெட் படங்கள்..நன்றாக இருந்தாலும் தியேட்டர் கிடைப்பதில்லை.அப்படியே கிடைத்தாலும்..இப்படங்கள் அவற்றில் ஒரிரு காட்சிகளே ஒரு நாளைக்கு நடைபெறுகின்றன.இதற்கு உதாரணமாக போர்க்களம்,நாணயம் ஆகியவற்றைச் சொல்லலாம்.இவையும் நல்ல வரவேற்பு பெற வேண்டிய படங்கள்.சின்ன மீனை பெரிய மீன்கள் சாப்பிட்டு விட்டன.தவிர்த்து..ஒரு மினிமம் பட்ஜெட் படத்திற்கு பெரிய தியேட்டரில் 150 ரூபாய் கொடுக்க நம்ம ஆளுங்க தயாராய் இல்ல.

தீராத விளையாட்டுப் பிள்ளை பெரிய பேனர் என்பதால்.. சில படங்கள் வசூல் சற்று திருப்திகரமாக இருந்தும் அவற்றை எடுத்துவிட்டு இப்படம் போடப்பட்டுள்ளது.

ஜக்குபாய், தியேட்டர் கிடைக்காததால் பொங்கலன்று வெளியாகவில்லை..அன்று வெளியாகி இருந்தால்..இன்னும் சில லட்சங்கள் அதிகம் வசூலித்திருக்கும்..

தமிழ்ப்படம்..வெளிவந்த அன்று..அதற்கு வழிவிட குட்டி படம் சில தியேட்டர்களிலிருந்து எடுக்கப்பட்டது.

சமீபத்தில்..பண்டிகைகளில் நான்கு படங்கள் வரவேண்டும்..மாதம் இவ்வளவு படம் வரவேண்டும் என்றெல்லாம் தீர்மானித்த பட அதிபர்கள்..ஒரு படம் அதிக தியேட்டர்களை எடுத்துக் கொண்டு..மற்ற படங்களுக்கு தியேட்டர் இல்லை என்ற நிலையையும் மாற்ற வேண்டும்..

இல்லையேல்..இதே போக்கு நீடித்து..பெரிய பேனர்..நல்ல சேனல் விளம்பரம் உள்ள படங்கள் மட்டுமே..தரம் தாழ்ந்திருந்தும் வரும் நிலை ஏற்படும்.தரமுள்ள மீடியம் ,குறைந்த பட்ஜெட் படங்கள் வெளிவரா நிலை ஏற்படும்.

கேபிள் சங்கரின் சிறுகதைத் தொகுப்பு - ஒரு பார்வை

கேபிள் சங்கரின் வலைப்பூவை படிப்பவர்கள் கண்டிப்பாக 'லெமன் ட்ரீயும் இரண்டு ஷாட் டக்கீலாவும்' படித்திருப்பார்கள்.ஆனால் அந்தப் பெயரைத் தாங்கி வந்திருக்கும் அவரின் சிறுகதைத் தொகுப்பு..அவரை அறியாத..சராசரி வாசகர்கள்..இப் புத்தகத் தலைப்பைக் கண்டு..பிறமொழியிலிருந்து மொழி பெயர்க்கப்பட்ட கதைகள் போலும்..என்று என்ன வாய்ப்புண்டு.

இத் தொகுப்பில் உள்ள கதைகள் பெரும்பாலும் தரிசன..சாரி..நிதர்சனக் கதைகள்.

1) முத்தம்- 'ஹலோ..9840071..' கேபிள்ஜியா..கதையை அழகு நடையில் எழுதியுள்ளீர்கள்.ரமேஷிற்கு அவள் முத்தமிட்ட உதடுகளில் லேசான வலி என்ற முடிவின் போது..அந்தப் பெண்ணை எண்ணி நமக்கும் மனதில் சற்று வலிக்கவே செய்கிறது.

2)லெமன் ட்ரீயும் இரண்டு ஷாட் டக்கீலாவும்- சிலர் புத்தகம் படிக்கையில்..கடைசி பக்கத்திலிருந்து படிப்பார்கள்.அதுபோல் படிப்பவர்கள்..இக்கதையின் கடைசி இரு வரிகள் படித்தால்..'உங்க வயசை தெரிஞ்சுக்கலாமா? என்றதற்கு..சிரித்தபடியே..சுற்றிலும் உள்ள பெண்களையும் பார்த்து ரகசியமாய் சொல்வதுபோல என் காதருகே 'எழுபது' என்று கத்தினான்..
எங்கே எழுந்துட்டீங்க..இந்தக் கதையைப் படிக்கத்தானே..

3)கல்யாணம்-இக்கதையைப் பற்றி..ஆறாவது மாடியில் இறங்கிட்டு..அஞ்சாவதுக்கு நடந்து வந்துடுங்க என்ற கேபிளின் வரிகளே என் விமரிசனம்

4) ஆண்டாள்-ஆண்டாள் TVS50ல போகும்போது அசுர வேகத்தில சைக்கிள்லப் போய் அவ முன்னால நின்றேன் என்னும் வரிகள்..சங்கர் கண்டிப்பாக தமிழ்ப்பட இயக்குநர் ஆகும் தகுதியை பெற்று விட்டார் என்பதைக் குறிக்கிறது.

5)ஒரு காதல் கதை.. இரண்டு கிளைமாக்ஸ் - இந்தக் கதைக்கு இரண்டு முடிவு..இரண்டும் அருமை.."ஏற்கனவே வெடித்து..வழிய தயாராய் இருக்கிற குலுக்கிய ஷாம்பெயின் பாட்டில் போல் பொங்கி நுரைத்து.." சங்கர் எப்படி இப்படியெல்லாம்ம்..ம்..ம்...ம்..!!!!

6)தரிசனம்-யதார்த்தமான கதை..கடவுளின் அவதாரங்கள் என்று சொல்லிக் கொள்பவர்கள் ஏமாற்று பேர்வழிகள் என்பதை நாசுக்காக சொல்லும் கதைகள்..'துரைமுருகன்' ஞாபகத்தில் வருவதை தவிர்க்க முடியவில்லை.

7)போஸ்டர்- எனக்கு மிகவும் பிடித்திருந்தது.நல்ல நடை..எதிர் பாரா முடிவு..வெல்டன்

8)துரை-நான்-ரமேஷ் சார்- துணை நடிகைப் பற்றிய கதை.அவள் படும் துன்பங்கள்..கணவன் துரையின் போக்கு..இயக்குநரின் எதிப்பார்ப்புகள்..நடுவே ரமேஷ் போன்றவர்கள்..பாத்திரப் படைப்புகள் அருமை. கேபிள்..இக்கதைக்காக பிடியுங்கள் பூங்கொத்து

9)என்னைப்பிடிக்கலையா- காதலித்து மணந்த கணவனிடமிருந்து..திருமணத்திற்குப் பின் அங்கீகாரம் கிடைக்கவில்லையெனில்...சிலர் வாழ்வு தடுமாறிப் போகலாம் என்பதை சொல்லும் கதை

10)காமம் கொல்-ஆகா..கேபிள்..இதை இணையத்தில் படித்திருந்தாலும்..அச்சில் படிக்கையில்..தைரியம்தான் உங்களுக்கு..

11)ராமி-சம்பத்-துப்பாக்கி - விமரிசிக்க ஒன்றுமில்லை

12) மாம்பழ வாசனை- கேபிளாருக்கான தனித்தன்மையான வாசனை இக்கதை

13)நண்டு-இந்த கதையின் முடிவை , முதலிலேயே யூகிக்க முடிந்தாலும்..கடைசி பத்தி படிக்கையில் மனம் சற்று சங்கடப் படவே செய்தது..அநேகமாக மார்பு என்ற சொல் இக்கதையில் மட்டுமே இல்லை எனலாம்.

அருமையான விருந்துக்கு அமர்ந்துக் கொண்டிருக்கும் போது..இலையின் நடுவில் இனிப்பைப் போட்டுவிட்டு..ஓரத்தில் அன்னம் வைத்ததைப் போல..சற்று திகட்டவே செய்கிறது அளவிற்கு அதிகமாக சில இடங்களில்.

கேபிளாரின் திறமைக்கு..இன்னும் பல அருமையான தொகுப்புகளை எதிர்ப்பார்க்கலாம்.

பரிசலின் புத்தகம்..ஒரு பறவையின் கண்ணோட்டத்தில்

பரிசல் இணையதளத்தில் எழுதிய கதைகளும்..ஒன்றிரண்டு விகடனில் வந்தவையும் சேர்த்து மொத்தம் 17 சிறுகதைகளின் தொகுப்பாக நாகரத்னா பதிப்பகத்தின் சார்பில் சக பதிவர் குகன் பதித்துள்ள புத்தகம்'டைரிக்குறிப்பும் காதல் மறுப்பும்"

இதில் இரு கதைகளைத் தவிர மற்றவை மிகச் சிறியக் கதைகள்.

தனிமை கொலை தற்கொலை- விக்னேஷ்,அமுதன் இரு நண்பர்கள்.விக்னேஷ்..மிருதுளா என்ற பெண்ணிடம் நட்பு பாராட்ட..அதைப் பொறுத்துக் கொள்ள முடியாத அமுதன்..நண்பனைப் பற்றி மிருதுளாவிடம் போட்டுக் கொடுக்க..நட்பில் விரிசல் ஏற்படுகிறது.இதனால்..தன் நண்பன் அமுதனைக் கொல்ல விழைகிறான் விக்னேஷ்..ஆனால் அமுதனோ தன் நண்பன் தன் நண்பன் தன்னை விட்டு விலகுவதுக் கண்டு..வேறு ஒரு முடிவு எடுக்கிறான்..கொஞ்சம் பரிசல் நடை..கொஞ்சம் சுஜாதா நடை

2)காதல் அழிவதில்லை- இதிலும் நண்பர்கள் இருவர்..மகேஷ்வரி என்னும் பெண்..காதல் வயப்படும் காதலன் என்னவெல்லாம் பேசுவான்..எப்படியெல்லாம் பேசுவான்..என்பதையெல்லாம் இயல்பாக எழுதியுள்ளார்..உண்மைக் காதல் என்றும் அழியாது என்கிறார் போலும்..

3)காதலிக்கும் ஆசை இல்லை- இரு பெண்கள்..ஒரு ஆண்..கேசவ் வை திவ்யா காதலிக்க..அவளுடன் அந்த எண்ணத்தில் பழகாத கேசவ் அதை நாசுக்காக அவளுக்குத் தெரிவிக்கிறான்..இது கதை..திவ்யாவின் தோழியின் பெயர் தீபா என்று இருப்பதால் இது சாத்தியமாகிறது.

4)பட்டெர்ஃபிளை எஃபெக்ட்- கதையில் வரும் சிறுமிகள் மீரா..மேகா..வேலைக்கு செல்லும் அம்மா உமா..பரிசலின் உண்மைக்கதையாய் இருக்கக்கூடும்..மீரா தி கிரேட் என்று சொல்லவைக்கும் கதை.

5)இருளின் நிறம்- மின்வெட்டை ஆதரிக்கும் பேரப்பிள்ளைகளிடம் பாசமுள்ள பாட்டியின் கதை..விகடனில் வெளிவந்து பாராட்டுப் பெற்றது.

6)நான் அவன் இல்லை- சார்லி..வேலை தேடப்போய் வம்பில் மாட்டிக் கொள்ள..அவனை காவல் துறையிடம் இருந்து காப்பாற்ற யாருமே இல்லை..மணிமாறன் அதிர்ஷ்டக்காரன்..அவன் யார் என்கிறீர்களா..சார்லி சொல்லும் 'நான் அவனில்லை' யில் இருக்கிறது விடை

7)மாற்றம்- தான் சிறுவனாயிருந்தபோது முடி வெட்டிக் கொள்ள சென்ற முடிதிருத்தகத்தையும்..கால மாற்றத்தில்..அந்த கடைகள் எல்லாம் நவீன வசதிகளுடன் மாறிவிடுவதையும்..அப்படி தான் சென்ற ஒரு கடையின் முதலாளி பழைய கடையின் ஆளே என்று அறிகிறான் அவன்..காலத்தின் மாற்றம்..அந்த மனிதனின் ஒரு பழக்கத்தை மட்டும் மாற்றவில்லை என்கிறது கதை.

8)மனிதாபிமானம்-மனிதநேயம் பற்றி பேசுகிறோம்..ஆனால்..மனிதாபிமானம் நிறைந்த ஒருவர்..அதனால் பயனடைந்த குடும்ப உறுப்பினர் ஒருவரிடம் அடையும் மனவேதனையை அற்புதமாகச் சித்தரிக்கும் கதை.

9)நட்பில் ஏனிந்த பொய்கள்?-இரு நண்பர்கள் பற்றிய கதை..தான் உயர்ந்த நிலையில் இருப்பதாகப் பொய் சொல்லும் நண்பனை, அவன் சொல்வது பொய் எனத் தெரிந்தும்..கற்பனையில் அவன் அப்படியே வாழட்டும் என எண்ணுகிறான் மற்ற நண்பன்.

10)கைதி- ஒரு பக்கக் கதை ..எதிர்பாரா முடிவு..

11)ஜெனிஃபர்- இத்தொகுப்பில் உள்ள பெரிய கதை..இணையத்தில் படித்திருந்தும்..மீண்டும் படிக்கையிலும் சுவை குன்றாத நடை.ஒருவர் மேல் உள்ள பொசசிவ்னஸ் அவரை திருமணம் செய்துக்கொண்டால்..நாளடைவில்..விரும்பாத காரியங்கள் செய்கையில் கோபத்திற்கு ஆளாகக் கூடும்..அவரவர் வாழ்க்கையை வாழ்ந்துக் கொண்டு இரண்டு பேரும் சேர்ந்து இருக்கிறோம்..அதற்கு குந்தகம் ஏற்படக் கூடாது..என்ற 46வயது முதிர்கன்னியின் கதை..இக் கதை ஆக்கியோனின் கருத்து இது என்று கொள்ளாமல்..ஜெனிஃபரின் கருத்து என எண்ணினால் விமரிசிக்க ஏதும் இல்லை.

12)கடைசி ஓவரில் ஒரு ஆபரேஷன்- கதையின் ஆரம்பத்திலெயே முடிவு தெரிந்து விடும் சிறுகதை..விசேஷமாக ஏதும் இல்லை.

13)டைரிக்குறிப்பும்..காதல் மறுப்பும்- ஒரு பாரகிராஃப் முடித்து அடுத்ததை விடுத்து..அடுத்ததை தொடர்புக்கு படிக்கும் யுக்தியில் அமைந்த கதை..இன்னும் சிறப்பாக அமைத்திருக்கலாம்..ஆனாலும் முடிவு பாதியிலேயே தெரிந்து விடுகிறது.இக்கதையை ஏன் புத்தகத்தின் தலைப்பாய் பரிசல் தேர்ந்தெடுத்தார்?..கதையின் தரத்திற்கா..அப்படியெனில் ..சாரி ..பரிசல்..நீங்கள் தேர்ந்தெடுத்திருக்க வேண்டிய தலைப்பு..இவற்றில் ஒன்றாய் இருந்திருக்கலாம்..
பட்டெர்ஃபிளை எஃபெக்ட்...அல்லது மனசுக்குள் மரணம்

14)மனசுக்குள் மரணம்- இத்தொகுப்பில் என்னைக் கவர்ந்த கதை.முன்னரே படித்திருந்தாலும்..பரிசலின் அருமையான நடை மீண்டும்..மீண்டும் படிக்க வைத்தது..சுஜாதா இன்று இல்லை..ஆனால்..அவர் விட்டு விட்டு சென்ற பாணியை பரிசல் முயன்றால் ஓரளவு நிரப்பலாம்..இக் கதையை விமரிசிப்பதைவிட..புத்தகம் வாங்கி படியுங்கள்..

15)ஸ்டார் நெம்பர் ஒன்- ஒரு பிரபல கதாநாயகி..சில வருஷங்கள் கழித்து நிலை மாறியதும்..குணம் மாறிவிடுகிறாள்..ஆனால் அவளால் ஒரு காலத்தில் அவமானப்படுத்தப்பட்ட அசிஸ்டண்ட் டைரக்டர் இயக்குநர் ஆகி எடுக்கும் படத்தில் அவளுக்கு நேரும் கதியும்..இயக்குநர் அவளை நடத்திய விதமும்..இக்கதை சொல்கிறது.

16)நட்சத்திரம்- பணக்கார வீட்டு சிறுமியும்..ஏழை சிறுமியும் பற்றிய கதை.பணக்கார வீட்டு பெண்ணிடம் இருந்து கிடைத்த நட்சத்திர ஸ்டிக்கருக்கு பதில்..ஏழை சிறுமிக்கு இரவில் ஃபிளாட்ஃபாரத்தில் படுத்தவாறு..போர்த்திக் கொண்டிருக்கும் கிழிந்த போர்வையில் வானத்து நட்சத்திரங்கள் தெரிகின்றன.

17)சமூகக்கடமை- சமூகக்கடமைப் பற்றி பேசும் சுயநலவாதியின் கதை..

பரிசலின் இச்சிறுகதைத் தொகுப்புக் கதைகள் அனைத்தும் முன்னரே படிக்கப்பட்டதாய் இருந்தாலும்..மீண்டும் படிக்கையில் சுவாரஸ்யமாகவே உள்ளது.ஆனாலும்..பதிவர்களின் எழுத்துகளை புத்தகமாகக் கொண்டுவரும் பதிப்பகத்தார்..அவர் இணையத்தில் எழுதாத சில கதைகளையும் இணைக்கலாம்.

இப்புத்தகம் வாங்கலாமா? என்கிறீர்களா..கண்டிப்பாக வாங்கலாம்..17 கதைகள் வெறும் 50 ரூபாய்க்கு..நீங்கள் வாங்குவதோடு நில்லாது..உங்கள் நண்பர்கள் இல்ல விழாவிற்கும்..பணமாய் மொய் எழுதுவதற்கு பதில் இது போன்ற புத்தகங்களை வாங்கி பரிசளிக்கலாம்..

மொத்தத்தில்..சின்ன சுஜாதாவின் புத்தகம் படித்த திருப்தியை இப்புத்தகம் ஏற்படுத்தியது.

மௌனராகம்

சம்மதத்திற்கும்

தர்க்கம் தவிர்க்கவும்

மௌனமே

மௌனமாய் அமர்கிறது


2) பெயரோ ஸ்ரீமதி

இன்னமும் அவள்

செல்வி


3)கர்ப்பிணிப் பெண்

மெதுவாக நடக்கிறாள்

வெண்மேகத்தின் வேகத்தை விட

சூல் கொண்ட

கார்மேகம் வேகம் குறைவுதானே!


4)என் இதயம் உன்னிடம்

என்றவளைக் காணவில்லை

இதயம் இல்லாதவள்

யாரையேனும் கண்டால்

தெரிவியுங்கள்

திரும்ப அனுப்பிவிடுகிறேன்


5)கடிகாரம்

நாட்காட்டி - இவை

காலம் காட்டினாலும்

காலனை நினைப்பதில்லை

கல் நெஞ்சர்கள்

தமிழ்ப் படமும்...தமிழ்ப் பதிவர்களும்..

கேபிள் சங்கர், பரிசல்காரன் இருவரும் எழுதிய சிறுகதைத் தொகுப்புகள் புத்தக வெளியீட்டு விழாவில்..கலந்துக் கொண்ட பிரமிட் நடராஜன் பேசுகையில்..

தான் கேபிள் சங்கருக்கு சித்தப்பா முறை உறவு என்றும்..1959ல் சென்னை வந்த தன்னை கேபிளாரின் தந்தை கொடுத்த ஆதரவையும் நினைவுக் கோரினார்.மேலும் பேசுகையில்..அன்று வெளியிடும் புத்தகங்கள் முழுதும் தான் படிக்கவில்லை என்றும்..ஆயினும் கேபிளின் எழுத்தில்..50-55 வயதான எழுத்தாளருக்கான முதிர்ச்சி இருக்கிறது என்றும் கூறினார்.இச் சமயம் மற்றொரு பிரதம விருந்தினரான தமிழ்ப் பட இயக்குநர் சி.எஸ்.அமுதன் உள்ளே நுழைந்தார்.

கலைஞருக்கான விழாவில்..ஒருவர் பேசிக் கொண்டிருக்கும் போது..ரஜினி உள்ளே நுழைந்தால்..எந்த அளவு கூட்டத்தினரிடையே சலசலப்பு ஏற்படுமோ..அப்படியான சலசலப்பு எழுந்தது.,

அதற்கு பின் புத்தக வெளியீட்டு விழா..சிறிது நேரம் 'தமிழ்ப் பட.'.வெற்றிக்கான பாராட்டு விழாவாக மாறியது .பிரமிடார்..தான் இதுவரை அப்படம் பார்க்கவில்லை என்றும்..காரணம் டிக்கெட் கிடைக்கவில்லை என்றுக் கூறியதுடன் நில்லாமல்..'இன்று கூட மாயாஜாலில் டிக்கெட்டிற்கு முயன்றதாகவும்..அதன் நிர்வாகிகள் எந்த படத்திற்கான டிக்கெட் வேண்டுமானாலும் தருவதாகவும்..தமிழ்ப்பட டிக்கெட் இல்லை என்று சொன்னது...சாரி..சார்..உங்களுக்கே இது கொஞ்சம் மிகையாகத் தெரியவில்லை.இதை என்னைப்போன்றவர் சொல்லியிருந்தாலும் ஒப்புக்கொண்டிருக்கலாம்.

அடுத்து பேசிய இயக்குநர்..தான் தாமதமாக வந்ததற்கு வருத்தம் தெரிவித்தார் பின்..இணையத்தில் தன் படம் பற்றி விமரிசனம் எப்படி வருகிறது என பார்த்ததாகவும்..தான் பார்த்த முதல் தமிழ்ப்படத்திற்கான விமரிசனம் பரிசலுடையது என்றும்..அதைப் படித்தபின் படம் வெற்றி என எண்ணியதையும் குறிப்பிட்டார்.அவர் மேலும் பேசுகையில்..பதிவர்கள் செய்யும் விமரிசனம் உயர் தரத்தில் இருப்பதாகவும்..பத்திரிகைகள் விமரிசப்பதைவிட தரமானதாகவும்..எதை சொல்ல வேண்டுமோ அதைச் சொல்வதாகவும்..சில குறிப்பிட்ட காட்சிகள் பற்றிய சஸ்பென்ஸை வெளியிடாமல் திரையில் பாருங்கள் என்று எழுதுவதையும் பாராட்டினார்.கிட்டத்தட்ட ஐந்து லட்சம் பார்வையாளர்களை இணையதள விமரிசனங்கள் திரையரங்கிற்கு வரவைப்பதாகக் கூறினார்.தன் பெயரை..கதை,திரைக்கதை,வசனம்,இயக்கம் என்று போட்டுக் கொண்டாலும்..அவற்றில் பெரும்பங்கு நம் சக பதிவர் சந்துருக்கு இருக்கிறது என்று சொன்ன இயக்குநர் பாராட்டுக்கு உரியவர்.எவ்வளவு இயக்குநர்கள் இப்படி உண்மையைச் சொல்வார்கள்?

வெளியிட இருக்கும் புத்தகங்கள் இரு நாட்கள் முன்னதாகவே தனக்கு கிடைத்திருந்தும்..தன்னால் வேலைப்பளு காரணமாக படிக்க முடியவில்லை என்றும்..தான் கூடிய விரைவில் படித்து..அதை எழுதியவர்களை தொடர்புக் கொண்டு..தன் கருத்தைத் தெரிவிப்பதாகக் கூறினார்.

பின் அஜயன்பாலா பேசினார்...பேசினார்..பேசினார்..

பொன்.வாசுதேவன் பேசுகையில்..பதிப்பகத்தார் இன்னலைக் கூறினார்..இன்னமும் தன் பதிப்பகத்தில் ஒரு அறை முழுதும்..புத்தகங்கள் தேங்கிக் கிடப்பதாகக் கூறியவர்..நர்சிம் எழுதிய புத்தகம் நன்கு மூவ் ஆவதாகவும்..அடுத்து பா.ரா., வின் புத்தகமும் விற்கிறது என்றார்.

அடுத்து புத்தகங்களை வெளியிட்ட நாகரத்னா பதிப்பக உரிமையாளரும்..சக பதிவருமான குகன்..பரிசலுக்கும்..சங்கருக்கும் நன்றியை தெரிவித்தார்.

சங்கரின் வரவேற்புரை..மண வீட்டில் புது மணப்பெண்ணிடம் காணும் கூச்சத்துடன் இருந்தது.

பரிசல்..ஏற்புரையில்..தன்னை எழுதத் தூண்டிய நண்பர்களை நினைவுக் கூர்ந்தது அழகு.

நிகழ்ச்சியை இந்தவார தமிழ்மண நட்சத்திர பதிவாளரான சுரேகா தொகுத்து வழங்கினார்..அருமையாக இருந்தது அவர் வழங்கிய முறை.

இநிகழ்ச்சிக்கும்..தமிழ்ப்படத்திற்கு ஹவுஸ்ஃபுல் ஆவது போல் ஹால்ஃபுல் லாக பதிவர்கள்.ஒவ்வொருவரையும்..தனித்தனியே பெயரிட்டால்..பலர் விட்டுப் போக வாய்ப்புண்டு..ஆகவே அதை தவிர்க்கிறேன்..அதே சமயம்..நிகழ்ச்சிக்கு குடும்பத்துடன் வந்திருந்தார் பரிசல்.தவிர கோவையிலிருந்தும்,திருப்பூரில் இருந்தும்வந்திருந்த வடகரை வேலன்,சஞ்செய்,வெயிலொன்,சொல்லரசன், ஈரவெங்காயம் ஆகியவர்களுக்கு பாராட்டுகள்.

இந்நிகழ்ச்சியைப் பற்றி நான் சொல்ல விரும்புவது..

1)பதிவர்களே! உஷார்..ஏனோ தானோ என எழுதாதீர்கள்..உங்கள் எழுத்துகள்..பத்திரிகைகளாலும்..திரைத்துறையினராலும் படிக்கப் படுகின்றன..பொறுப்புணர்ந்து செயல் படுங்கள்.

2)நிகழ்ச்சிக்கு வந்தவர்கள் பலர் வெறும் கையுடன் திரும்பினர்..அவர்கள் எல்லாம்..புத்தகங்களை வாங்கிச் செல்லுங்கள்..அப்போதுதான் நாளைக்கு நீங்கள் எழுதும் புத்தகங்களும் வாங்கப்படும்.

3)இது போன்ற நிகழ்ச்சியில் கலந்துக் கொள்ளும் பிரதம விருந்தினர்கள்..அன்று வெளியிடப் படும்..புத்தகங்கள் பற்றி மட்டுமே பேசுங்கள்.. உங்களுக்கு புத்தகங்கள் முன்னதாகக் கொடுக்கப் படுகின்றன..உங்களுக்கு வேலைப்பளு இருந்தாலும்..புத்தகத்தைப் படித்துவிட்டு அது பற்றி மேடையில் பேசுங்கள்.தடம் மாற வேண்டாம்.

ஆமாம்..நீ புத்தகங்கள் பற்றி ஏதும் சொல்லவில்லையே என்கிறீர்களா?

பரிசலின் 'டைரிக்குறிப்பும் காதல்மறுப்பும்' (மொத்தம் 17 சிறுகதைகள்)

கேபிள் சங்கரின்'லெமன் ட்ரீயும் இரண்டு ஷாட் டக்கீலாவும்..'(13 சிறுகதைகள்)

இரண்டு புத்தகங்களையும் நேற்றுதான் வாங்கியுள்ளேன்..படிக்காமல் விமரிசிக்க நான் என்ன பிரதம விருந்தினரா..படித்துவிட்டே எழுதுகிறேன்..

(புகைப்படம் மோகன்குமார் இடுகையிலிருந்து சுடப்பட்டது)

ஆதலினால் காதல் செய் ...

1.பூக்கள் கொட்டிக் கிடக்கின்றன. அதில் உனக்காக ஒரு பூ கத்திருக்கிறது.அதை தேர்ந்தெடுக்கிறாயே..அதுதான் காதலின் சக்தி.

2.காதல்..என்பது..ஒன்றை அடைதல் அல்ல..ஒன்றை உணர்தல் என்ற எண்ணம் இருவருக்கும் வேண்டும்.

3.காதல் ஒரு அற்புத உணர்வு..பூத்து..காய்த்து..உதிர்ந்திடும் பூ அல்ல அது.மரணம் வரை தொடரும் விஷயம்..மரணம் வரை தொடரும் வாழ்க்கை.

4.இரவில் கவிதை
கவிதையான இரவு
கனவில் நிலவு
நிலவு பற்றி கனவு
தனிமையில் சிரிப்பு
சிரிப்பில் தனிமை
இதுதானா காதல்?

5.காதலில் ஜெயித்தவர்கள் கதை..ஒவ்வொருவருக்கும் மாறுபடும்..ஆனால்..தோற்றவர்கள் கதை ஒரே மாதிரி இருக்கும். புறக்கணிக்கப்பட்ட தோல்வி..அதனால்தான் தாங்கமுடிவதில்லை.

6.காதல் வயப்படுபவன்(ள்)..இடம்..பொருள்..இரவு..பகல்..பேதமிருக்காது.மனம்..உற்சாகத்திற்கும்..லேசான துக்கத்துக்குமாக மாறி மாறி பயணிக்கும்.மனதில் மழை பெய்யும்..மத்தாப்புக்கள் பூ சொரியும்.

7.அழகு..அறிவு..எல்லாவற்றிலும்..கடந்த மென்மையான உணர்வு காதல்.

8.காதல் என்பது எதுவரை
கல்யாண காலம் வரும்வரை - கண்ணதாசன் வரிகள்

9.பறக்கத் தெரியும்
திசை தெரியாது
காதல் ஓர்
இலவம் பஞ்சு

_ கபிலன்

(மீள்பதிவு)

வாடா மலர் (காதலர் தின ஸ்பெஷல்)

1)தங்கமானவளை நம்பாதே

செம்பு போன்றவளை நம்பு

அவளிடம் தான்

கலப்படம் இல்ல



2) இன்று பூத்து

நாளை வாடிவிடும்

மலரல்ல காதல்

சாகாவரம் பெற்ற

வாடா மலர் அது


3)ஊரறியாமல்

சன்னல் வழியே காதலியுடன்

உரையாடுவதாக எண்ணாதே

எதிர் சன்னல் வழியே

ஊர் உன்னைப் பார்த்துக் கொண்டிருக்கிறது


4)நீ நடக்கையில்

உன் கொலுசு சப்தமும்

உன்னைக் காதலிக்கிறேன்

உன்னைக் காதலிக்கிறேன் - என

உன்மத்தம் பிடித்து உளருகிறது


5)கவிதை என்றால்

என்ன என அறியாதவன்(ள்)

உன்னை காதலிக்க ஆரம்பித்ததும்

எழுதித் தள்ளுகிறேன்

கவிதை என்ற பெயரில்


6)நான் அன்பானவள்

நான் அன்பானவள்

சொல்லிக் கொண்டே இராதே

செயலில் காட்டு

அமெரிக்க தலைநகர் வாஷிங்டனில் பனிப்பொழிவு

தேங்காய்..மாங்காய்..பட்டாணி..சுண்டல் (12-2-10)

1) அண்டை மாநிலங்களில் மதுவிலக்கு அமலில் இல்லாதபோது தமிழ்நாட்டில் மட்டும் ஏன்? என அவரிடம் கேட்கப்பட்டது..அதற்கு அவர் 'அடுத்த வீடுகளில் ஒழுக்கமில்லாத பெண்கள் குடியிருந்தால்..நம்ம வீட்டிலும் அப்படி இருக்க வேண்டும் என்ற அவசியமில்லை' என்றார்.அவர் சின்ன அண்ணாமலை

2)68 வகை சாப்பாடு..25 வகை ஊறுகாய்..17 வகை பாயசம்..15 வகை அப்பளம்..இனிப்பு அல்வா விலிருந்து ஜாங்கிரி வரை..இவ்வளவும் ஒரு திருமண வீட்டு கல்யாண சாப்பாடு.கல்யாணம் முடிந்ததும்..எந்தெந்த சாப்பாடுக் கூடத்தில் என்னென்ன உணவு என்பதற்கு பட்டியலுடன் ஒரு மேப்பே கொடுக்கப் பட்டதாம்.
அந்தத் திருமணம் கோவை ஸ்ரீ கிருஷ்ணா ஸ்வீட்ஸ் அதிபர்களின் இல்ல வீட்டு திருமணம்.
அது சரி பல்லிருக்கிறவன் பக்கோடா சாப்பிடறான்.

3)தண்ணீர் எந்த அளவு குளத்தில் உள்ளதோ..அதில் மலர்ந்துள்ள தாமரைத் தண்டின் அளவும் அவ்வளவே இருக்கும்.அதுபோல மனிதனின் வாழ்க்கையின் உயர்வு அவர் மனதில் கொண்டுள்ள ஊக்கத்தின் அளவே இருக்கும்.

4) எத்தனை லட்ச ரூபாய் கார் நம்மிடமிருந்தாலும்..உற்பத்தி செய்ய முடியாத இறைவன் அளித்துள்ள காற்று இல்லையேல் கார் ஓடாது..என்னதான் புத்தி ஓங்கி நின்றாலும்..விதி துணை இல்லாமல் வீதி கூட ஏற்றுக்கொள்ளாது. - கண்ணதாசன்

5) நமது புராணக்கதைகள் நையாண்டி செய்யப்படுகின்றன.இவை கற்பனைக் கதைகள் தான்.கற்பனை என்பதே புளுகு தானே..ஆனால் மோசடி இல்லையே..அந்த புரிதலோடு படித்தால் புராணக்கதைகளும் சுவையாக இருக்கும்.

6)கொசுறு ஒரு ஜோக்

ஓட்டலில் உணவு அருந்துக் கொண்டிருப்பவர்..சாம்பாரில் ஒரு பல்லி இருப்பதைப் பார்த்துவிட்டு..அதைக் காட்டி கோபத்துடன்..- இந்தாப்பா சர்வர் இதுக்கு என்ன அர்த்தம்..?

சர்வர்- பல்லி விழும் பலன் எல்லாம் எனக்குத் தெரியாது சார்

அசையும் வளைவுகள்

விதியை

மதியால் வெல்லலாம்

என்றவர்கள் கூட

செத்துத் தொலைத்திருக்கிறார்கள்

மதியின்றி


2)தேங்கிய மழைநீரில்

பேருந்தின் டீசல் சிந்தி

தரையில் வானவில்


3)ஒன்றுக்கு போகக்கூட

ஒன்றுமில்லாதவனால் முடியாது

அதற்கும் வேண்டும்

அம்பது காசு


4)தாய் பசித்திருக்க

தன் நலமாய் இராதே

நீ பசித்திருக்கையில்

நாளை உன் மகன் செய்வான்

உனக்கு


5)அசையும் வளைவுகள்

அசையாத வளைவுகளாய்

இட்ட கோலங்கள்

சிரிப்போம்...சிரிக்க வைப்போம்...

வாழ்க்கை என்பது ஒரு அற்புதம்..அதை இன்பகரமாக வாழ்ந்து காட்ட வேண்டியது..அவரவர் திறமை..ஏன்..அதை அவரவர் கடமை என்று கூட சொல்வேன்..அதற்கு..இன்றியமையா தேவைகள் பல இருந்தாலும்...குறிப்பாக நகைச்சுவை உணர்ச்சி முக்கியம்..

பல முக்கியச் செய்திகள்..நகைச்சுவையோடு கலந்து கொடுத்தால் தான்..நாம் எதிர்பார்த்தபடி..எதிர்ப்பார்த்த நபர்களை சென்று அடையும்.

ஆகவேதான்..திரைப்படங்களிலும்..கலைவாணர் அவர்களின் நகைச்சுவை..சில சீரிய..கருத்துக்களுடன் இருக்கும்.நகைச்சுவையாக சொல்லும்போது..முதலில் சிரித்தாலும்..பின்னர் அதில் பொதிந்திருக்கும் செய்தியை உணர்வோம்.

சிலர்...என்னதான் சிரிப்பான செய்தியைக் கேள்விப்பட்டாலும்...சிரிக்காமல்..எதையோ பறிகொடுத்தது போல் ..முகத்தை..சீரியஸ் ஆக வைத்திருப்பார்கள்.

நம்மை சிரிக்க வைத்த காமெடியன்கள் பலர் வாழ்க்கை..சோகமயமானது.உதாரணத்திற்கு..நடிகர் சந்திரபாபுவை சொல்லலாம்..அவர்கள் தங்கள் சோகத்தை மறந்து..தண்ணீருக்குள் மீன் அழுதால்..அதன் கண்ணீரை யார் அறிவார்..என்பதற்கேற்ப..அவர் தனிப்பட்ட சோகத்தை மறைத்து நம்மை மகிழ வைத்தார்.

பணத்தை பெரியதாக நினைப்பவர்கள்...சிரிப்பை மறந்தவர்கள்..

எந்திர மயமான வாழ்வில்..காலையில் கடற்கரையில்..நின்று ..உடல் நலனுக்காக..வலுக்கட்டாயமாக..சிரிக்க வேண்டியிருக்கிறது இன்று.. சிரிப்பு..அரு மருந்து என்பதால்..

சிரிப்பு...மனிதனுக்கு மட்டுமே..ஆண்டவன் கொடுத்த வரப்பிரசாதம்

சிரிப்போம்..வாய் விட்டு சிரிப்போம்...

வன்மத்தை விட்டு...எதிரியையும் சிரிக்க வைப்போம்..

சாதிக்க முடியாத விஷயங்களையும்..முக மலர்ச்சியுடன், எதிர் கொண்டால்..சாதிக்கமுடியும்..

புழுக்கம்

நூறு கிடைத்தது

இரு நூறுக்கு ஆசை

இரண்டாயிரம் கிடைத்ததும்

நாலாயிரத்திற்கு ஆசை

அதுவும் கிடைத்ததும்

நாசிக்கிற்கு ஆசை



2)கரிகாலன் காலைப்போல

கருத்திருக்கு குழலு..

என்றதும்

என்னைத்தான் சொல்லியுள்ளான்

கவிஞன்

என்கிறது குழலில் உள்ள

பேன்


3)மலர் பூக்கிறது

மணம் வீசுகிறது

வண்டு வருகிறது

மலரில் அமர்ந்து

தேனை சுவைக்கிறது

அடுத்த நாள்

மலர் வாட

வந்த வண்டு

அம்மலரை தவிர்த்து

அருகில் மலர்ந்துள்ள

புத்தம் புது பூவில்

அமர்கின்றது

அதன் தேனை சுவைக்க


4)கடற்கரையில்

மக்கள் வெள்ளம்

காற்றுக்கு புழுக்கம்

அகநாழிகை - குகன்- ஒரு ஆலோசனை

பதிவர்களின் பதிவுகளை அச்சில் கொண்டுவரும் செயலை முதலில் வாசுதேவன் ஆரம்பித்து வைக்க குகன் தொடர்ந்துள்ளார்.

கேபிள் ஷங்கர், பரிசல்காரன் ஆகிய பதிவர்கள் எழுதிய சிறுகதைகளை நாகரத்தினா பதிப்பகம் மூலம் குகன் அவர்கள் 14-2-10 அன்று வெளியிடுகிறார்.விவரங்கள் இங்கே..

யூத் பதிவர் என சொல்லிக் கொள்ளும் கேபிளாரும், யூத் பரிசலாரும் இந்த ஆண்டு காதலர் தினத்தை மறக்க மாட்டார்கள். அவர்களுக்கு என் வாழ்த்துகள்.

இப்போது தலைப்பிற்கு வருகிறேன்..

சிவராமனும், ஜ்யோவ்ராமும் இணைந்து உரையாடலுக்காக நடத்திய சிறுகதைப் போட்டியில் 250 சிறுகதைகள் வந்தன.பெரும்பாலான கதைகளை நான் படித்திருக்கிறேன்..அனைத்துமே தரமானவை.அகநாழிகையோ, குகனோ..அந்த 250 சிறுகதைகளையும் தொகுத்து புத்தகமாக கொண்டு வரலாம்.கண்டிப்பாக 1000 பக்கங்கள் வரை வரும்.புத்தகத்தின் விலையையும் அதற்கேற்றாற் போல வைக்கலாம்.பதிவர்கள் ஒத்துழைப்பில்..வெளியாகும் பிரதிகள்..முதல் பதிப்பு விற்று விடும்.யாருக்கும் இலவச பிரதிகள் கிடையாது எனலாம்.வேண்டுமானால்..யார் யாருக்கு புத்தகம் தேவை எனக் கேட்டு..முன் பணமும் பெறலாம்.ஆகவே இதற்கான மூலதனம் கண்டிப்பாக நஷ்டத்தை ஏற்படுத்தாது.

இந்த யோசனை பிடித்திருந்தால்..இதைப் படிப்பவர்கள் தங்கள் பின்னூட்டத்தில் தெரிவிக்கவும்.

அதை வைத்து அவர்கள் சாதகமான முடிவை எடுக்க வைக்க முயற்சிக்கலாம்.

நீதி வழங்குவது யார்?

பாய் விரித்து

பணம் பெற்று அணைப்போரை

பிணம் என்கிறான் வள்ளுவன்

பணம் பெற்று

வாக்களிப்போரை

என்னவென்பது?


2)விளக்குகள் அணைவதில்லை

திரியை தீண்டிவிடுவோரும்

எண்ணெய் ஊற்றுவோரும்

இருக்கின்றவரை


3)அரசியல்வாதிக்கு

இதய நோயாம்

அவனுக்கு ஏது இதயம்


4)காற்றடித்தது

தூசு பறக்கிறது

மலை அப்படியே இருக்கிறது


5) நீதி வழங்குமுன்

நீதிபதி சென்ற இடம்

நீதிமன்ற வளாக

நீதி வழங்கும்

நித்ய வினாயகரைத் தேடி

ஊடுதல் காமத்திற் கின்பம் (கொஞ்சி விளையாடும் தமிழ்-14)

தலைவன் தலைவியை தற்காலிகமாகப் பிரிந்து வெளியூர் செல்கிறான்.அவன் திரும்பி வரும் நாளை எதிர் நோக்கிக் காத்திருக்கிறாள் தலைவி.

ஒருநாள் எழுநாள்போல் செல்லும்கேண் சென்றார்
வருநாள்வைத் தேங்கு பவர்க்கு

நெடுந்தொலைவு சென்று காதலர் திரும்பி வரும் நாளை எதிர்பார்த்து ஏங்குபவளுக்கு ஒவ்வொரு நாளும் ஒரு யுகமாய்த் தெரிகிறது.

அவர் எப்போது வருவார்..எப்போது வருவார்..என நெஞ்சம் எதிர்பார்த்துக் கொண்டிருக்கிறது.அவரை என்று காண்பேன்..அவரைக் கண்ட பின்னரே என் மெல்லிய தோளில் படர்ந்துள்ள பசலை நிறம் நீங்கும் என்கிறாள் தலைவி.

கூடிய காமம் பிரிந்தார் வரவுள்ளிக்
கோடுகோ டேறுமென் நெஞ்சு

காண்கமன் கொண்கனைக் கண்ணாரக் கண்டபின்
நீங்குமென் மென்தோள் பசப்பு

என்றெல்லாம் வாடுகிறாள்..வரட்டும்..அவர்..ஒருநாள் வந்துதானே ஆகவேண்டும்..வந்தால் என் துன்பம் முழுதும் தீரும் வகையில் அவரிடம் இன்பம் துய்ப்பேன் என்கிறாள்..

வருகமன் கொண்கன் ஒருநாட் பருகுவன்
பைதல்நோய் எல்லாம் கெட

தலைவன் வருவதாகச் சொன்ன நாட்களில் எல்லாம் வழி மேல் விழி வைத்து காத்திருக்கிறாள்.தினம் தினம் ஏமாற்றமே..வந்தால் அவருடன் பேசக்கூடாது..ஊடல் கொள்ள வேண்டும் என்றெல்லாம் நினைக்கிறாள்.ஆனாலும் தனிமை அவளை வாட்டுகிறது.அச்சமயம் அவன் வந்துக்கொண்டிருக்கும் செய்தி எட்டுகிறது.

கண்ணின் மணியாம் காதலர் வந்ததும் பிரிந்திருந்த துயரின் காரணமாக அவருடன் ஊடல் கொள்வேனா...அல்லது கட்டித் தழுவிக் கொள்வேனா..அல்லது ஊடுதல்..கூடுதல் ஆகிய இரண்டையும் இணைத்துச் செய்வேனா..ஒன்றுமே புரியவில்லையே..எனக்கு..இன்பம் கட்டுக் கடங்காமல் போனதால்..எனமனதில் இன்பம் பொங்க செய்வதறியாது இருக்கிறாள்.

புலப்பேன்கொல் புல்லுவேன் கொல்லோ கலப்பேன்கொல்
கண்ணன்ன கேளிர் வரின்

'தல' நீ தான் அசல் (விமரிசனம் அல்ல)

கூட்டத்தில் பேச சந்தர்ப்பம் கிடைத்தால்..அதுவும் தலைவர்கள் நிரம்பியுள்ள கூட்டத்தில் பேசும் சந்தர்ப்பம் வந்தால்...தலைவரை ஆகா..ஒஹோ..என புகழ்ந்து தலைவரின் இதயத்தில் இடம் பிடிக்க நினைக்கும் காக்கைகள் கூட்டத்தின் நடுவே சில குயில்களும்..தன் பாணியில் கூவும்..அப்படி ஒரு குயிலின் கூவல் கேட்டது சனியன்று நடந்த முதல்வருக்கு பாராட்டு விழாவில் . அந்தக் குயில் 'தல'யுடையது.

இதற்குமுன் நடந்தவை என்ன....

விழா நடப்பதற்கு சில நாட்கள் முன் ..நிகழ்ச்சிக்கு வராத நடிக..நடிகையர்க்கு ரெட் கார்ட் போடப்படும் என சிலர் பேட்டி கொடுக்க..கலைஞர்கள் நடுவே..இது பெரிய பாதிப்பை உண்டாக்கியதாம்.நடிகர்கள் சங்க நிர்வாகிகளும் வருத்தப் பட்டனராம்.சங்கமே அப்செட் ஆனது தெரிந்த விழா அமைப்பாளர்கள் வருத்தம் தெரிவித்துவிட்டு..நிகழ்ச்சிக்கு அனைவரும் கலந்துக் கொள்ள வேண்டும் கேட்டுக் கிட்டாங்களாம்.

சினிமா நிகழ்ச்சிகள்லே கலந்துக்காத அஜீத் திற்கும் மிரட்டல் போயிற்றாம்.இதை அஜீத், கலைஞர்பாராட்டு விழா அன்று மேடையில் பேசியதும்,. மேடையில் இருந்த ரஜினியே எழுந்து நின்று கை தட்டினாராம்.

அஜீத் பேச்சின் சுருக்கம்...

அறுபது வருடத்திற்கும் மேலாக..தமிழ் மக்களுக்கும்..தமிழ் நாட்டிற்கும் தன்னை அர்ப்பணித்துக் கொண்ட மாபெரும் தலைவரை பாராட்ட வந்திருக்கிறேன்.தமிழர்கள் பொங்கலன்று சூரியனுக்கு நன்றி தெரிவிப்பது போல..இந்த சூரியனுக்கு நன்ன்றி தெரிவிக்கிறேன்..சினிமா உலகிற்கு நிறைய சலுகைகள் செய்துள்ளீர்கள்.

சமிப காலங்களாக சினிமா துறையினர் மீது கோபம் இருக்கிறது.தேவையில்லா விஷயங்களில் அவர்கள் தலையிடுவதால்..சென்சிடிவ்வான விஷயங்களில் அவர்கள் தலையிட வேண்டாம் என சொல்லுங்கள்.இங்கிருக்கிற சிலர் கட்டாயப்படுத்தி எங்களை அழைக்கின்றனர்.நாங்களும் வருகிறோம்.எங்களுக்கு அரசியல் வேண்டாம்.காவிரியில் தண்ணீர் விடவில்லையெனில் நீங்கள் இருக்கிறீர்கள்.பார்த்துக் கொள்ளுங்கள்.நாங்கள் செய்வதற்கு என்ன இருக்கிறது.ஒரு பக்கம் எங்களை அரசியலுக்கு வரக்கூடாது என்கிறார்கள்.வந்தால் மிரட்டுகிறார்கள்.நாங்கள் என்ன செய்ய வேண்டும்?

கலைஞர் பேசுகையில்..அஜீத் பெயரைக் குறிப்பிடாமல்..இது பற்றி பேசுகையில்..

நாம் கலைக்குடும்பம் என்ற வகையில் சேர்ந்திருக்கிறோம்..இதில் அரசியலை நுழைக்க விரும்பவில்லை.தானாக நுழைந்தால் நான் பொறுப்பல்ல.இந்த துறையில் அரசியலை நுழைத்து கெடுத்து விடாதீர்கள்.அரசியல் நுழைந்து ஆமை புகுந்த வீடாய் திரைப்படத் துறை ஆகிவிடக் கூடாது.யாரையும் வலியுறுத்தி வருகிறாயா..இல்லையா..எனக் கேட்க வேண்டாம்.வந்தவர்களை வாழ்த்துவோம் என்றார்.

மனதில் தோன்றியதை 'பளீச்' என ஒளிக்காமல் பேசிய அஜீத்தை பாராட்டுவோம்.

டிஸ்கி- கலைஞருக்கு பாராட்டுவிழா நடந்த அதே நாள்..தில்லியில் விலைவாசி பற்றி நடந்த..பிரதமர் கலந்துக் கொண்ட..மாநில முதல்வர்கள் கூட்டத்தில் தமிழக சார்பில் துணை முதல்வர் கலந்துக் கொண்டார்.

ஏழ்மை

அவனாக நினைத்தான்

அவனாக ஏங்கினான்

அவனாக அழுதான்

ஒரு தலைக்காதல்


2)குடித்துவிட்டு காரோட்டி

விமானத்தில் அழைக்கிறான்

காலதேவனை

3)வட்ட வட்டமாய்

குடிசைக்குள்

சூரிய நாணயங்கள்

தங்கக் காசுகள்

கொட்டுவது போல

தனலட்சுமி

மண்சுவற்றில்

4)உடல் வற்றிப்

பசியுடன் அலைகையில்

அவளைக் கண்டதும்

ஏற்பட்டது காமப் பசி

வாய் விட்டு சிரியுங்க...

1.நேத்து கண்காட்சியில என் மனைவி காணாம போயிட்டா..
நீ கண்காட்சி போறதை முன்னாலேயே சொல்லக்கூடாது,..நானும் என் மனைவியை அழைச்சுட்டு வந்திருப்பேன்.

2.என் மனைவிக்கும்...எனக்கும் பெரிய சண்டை
ஏன்
ஷாஜகான் மும்தாஜ் ஞாபகமா தாஜ்மகால் கட்டினார்னு என் மனைவி கிட்ட சொன்னேன்..நான் செத்தா நீ என்ன கட்டுவேன்னு கேட்டா..உன் தங்கச்சியை கட்டுவேன்னு சொன்னேன் அதுதான்.

3. நம்ம தலைவர் ..ஒவ்வொரு தேர்தலிலும் ஒவ்வொரு கட்சியோட கூட்டு வைச்சிருக்கறதால...நம்ம கட்சிக்கு பச்சோந்தி சின்னம் கேட்கிறாராம்.

4. சுடச்சுட சாம்பாரைக் கொட்டிட்டேன்னு..காதில பஞ்சை ஏன் அடைச்சிக்கிற
நான் சாம்பாரை கொட்டினது உங்க அம்மா மேல..

5.நடுராத்திரி பெண் பார்க்கப்போறியா...ஏன்?
பொண்ணு ஸாஃப்ட்வேர் இஞ்சினீயர்...நைட்ஷிஃப்ட் அதுதான்..

6.உன்னை நம்பி வந்தவங்களை ஏமாற்ற உனக்கு எப்படி மனசு வருது..
நம்பி வரவங்களைத்தான் ஏமாற்ற முடியும்...நம்பாதவங்களை எப்படி ஏமாற்றமுடியும்?

இறைவன் இரக்கமற்றவன்

அவள்

அன்றலர்ந்த மலராகவே உள்ளாள்

நலமா என்கையில்

மாமாவிற்கு வணக்கம் சொல்லு

பணிக்கிறாள்

பக்கத்து சிறுவனிடம்


2) காற்று இல்லை

மூச்சு முட்டுகிறது

ஜன்னலைத் திறக்கையில்

ஜன்னல் அளவே

உள்ளே நுழைகிறது


3)துன்பம் வந்தது

துன்பப் பட்டு

விட்டு ஓடியது


4)இறைவன் இரக்கமற்றவன்

வாங்கி வந்த மாடு

பால் கறக்கவில்லை

காரணம்

காளையாம் அது

மேடையில் பேசுவது எப்படி..? - 2

முதல் பகுதி

நல்ல கருத்துகள் சொற்பொழிவுக்கு அவசியம்.நாம் பேசுவது மக்கள் உள்ளத்தில் பதிய வேண்டுமானால்..அவை நல்ல கருத்துகள் கொண்டதாய் இருக்க வேண்டும்.பண்பற்ற..பயனில்லா சொற்களை மறந்தும் பேசக் கூடாது.

நயன்சாரா நன்மையின் நீக்கும் பயன்சாராப்
பண்பில்சொல் பல்லா ரகத்து

பயனற்றதும்..பண்பற்றதுமான சொற்களை பலர்முன் சொல்வது மகிழ்ச்சியைக் குலைத்து..நன்மையை மாய்க்கும்

சொல்லுக சொல்லிற் பயனுடைய சொல்லற்க
சொல்லிற் பயனிலாச் சொல்

பயனளிக்காத சொற்களை விடுத்து மனத்தில் பதிந்து பயனளிக்கக் கூடிய சொற்களையே கூற வேண்டும்.

பேச்சுக்கு கருத்துகளை எப்படி அமைப்பது.அதற்கு ஒரு வழி..

முதலில்..இன்று நாம் எதைப்பற்றி பேச வேண்டும்..என்னென்ன பேச வேண்டும் என்று எண்ணிப் பார்க்க வேண்டும்.முதல் கேள்விக்கான விடை தலைப்பாகவும்..அடுத்தக் கேள்விக்கான பதில் கருத்தாகவும் அமையும்.

அதை ஒரு சிறு அட்டையில் குறித்துக் கொண்டு 1, 2 என இலக்கமிட்டு முறைப்படுத்தி மனனம் செய்துக் கொள்ள வேண்டும்.பின் மேடை ஏறியதும் மனப்பாடம் செய்ததை வரிசைப் படுத்தி பேச வேண்டும்.இது வெற்றிகரமான பேச்சாக அமையும்.ஆரம்ப பேச்சாளர்கள்..இரண்டு அல்லது மூன்று கருத்துகளை மட்டுமே எடுத்துக் கொண்டு..ஐந்தாறு நிமிடங்களுக்குள் பேசி நிறுத்திக் கொள்ள வேண்டும். காலப் போக்கில் இது நமக்கு நல்ல நம்பிக்கையைக் கொடுக்கும்.

குறிப்புகள் எடுக்கையில் பேச வேண்டிய கருத்துகள் ஒவ்வொன்றும் மூன்று அல்லது நான்கு சொற்களுக்குள் இருக்கும்படி பார்த்துக் கொள்ளவும்.அதுதான் மனதில் பதியும்.மனதில் பதிந்ததைப் பேசி முடித்ததும்..நம் குறிப்பை எடுத்து..எல்லாம் பேசி விட்டோமா என்று பார்க்கலாம்.ஏதேனும் விட்டுப் போயிருந்தாலும் பரவாயில்லை.ஏனெனில் நம் பேச்சை கேட்டவர்களுக்கு அது தெரியப் போவதில்லை.
தொடக்கப் பேச்சாளர்கள்..எழுதியிருக்கும் குறிப்பை இடையிடையே பார்த்து பேசலாம்..ஆனால் இதுவே பழகிவிடக் கூடாது.

மேடைப் பேச்சில் எழுதிப் படிக்கிறார்களே பொறுப்பானவர்கள் என்று கேட்கலாம்..பொறுப்பான பதவியில் உள்ளவர்கள்..வேறு ஏதும் பேசிவிடக் கூடாதே என்பதற்காக கையாளும் முறை இது.ஆனால் பேச்சாளர்களுக்கு ஏற்றதல்ல இது.பார்த்து படிப்பது படிப்பதாகவே இருக்குமேயன்றி..அது பேச்சாக இராது.அதில் உணர்ச்சியும் இராது..

இப் பழக்கம் உள்ளவர்கள் ஒரு சிறந்த பேச்சாளர்களாக ஆகவே முடியாது.

தேங்காய்..மாங்காய்..பட்டாணி..சுண்டல்(5-2-10)

1)இந்தியாவின் குடியரசுத் தலைவர் அதிகாரபூர்வ அலுவலகமாகவும், இல்லமாகவும் திகழும் ராஷ்டிரபதி பவனின் மொத்த பரப்பு 4.5 ஏக்கராகும்.இதில் 340 அறைகள்,74 லாபிகள்.டைனிங் ஹாலில் ஒரே நேரத்தில் 104 பேர் அமர்ந்து சாப்பிடலாம்.பரிமாற இரண்டு பேருக்கு ஒரு சர்வர்.சைனீஸ்,இத்தாலியன்,மெக்ஸிகன்,ஐரோப்ப,தென்னிந்திய உணவுகள் என 24 மணி நேரமும் கிடைக்கிறதாம்.37 செயற்கை நீரூற்றுகள், வெந்நீர் நீச்சல் குளம் உண்டு.மாளிகையின் உள்ளே 900 சீருடை பணியாளர்கள் உள்ளனர்.இவர்களின் லாண்டெரி செலவு மாதத்திற்கு ஒருவருக்கு இரண்டாயிரம் ரூபாயாம்.

2)மணமாகி வீட்டிற்கு வரும் மணமக்களை நுழைவாயிலில் வலது காலை எடுத்துவைத்து வா என்கிறார்கள்.இப்படி எல்லாவற்றிலும் வலம் முதலிடம் பெறுவது ஏன் தெரியுமா? பூமி வலப்பக்கமாக சுற்றுகிறது என்பதாலேயே ஆகும்

3)தமிழுக்கு இனம் மூன்று.அவை வல்லினம்,மெல்லினம்,இடையினம் என்பதாம். நம் மொழியின் பெயரில் மூன்று இனங்களும் பிரதிநிதித்துவம் வழங்கப்பட்டுள்ளது.த- வல்லினம்., மி-மெல்லினம்.,ழ்-இடையினம்.

4) ஒரு மனிதன்
கோபமாய் பேசினால் குணத்தை இழப்பான்
அதிகமாய் பேசினால் அமைதியை இழப்பான்
வெட்டியாய் பேசினால் வேலையை இழப்பான்
வேகமாய் பேசினால் வேலையை இழப்பான்
ஆணவமாய் பேசினால் பெயரை இழப்பான்
சிந்தித்து பேசினால் சிறப்புடன் இருப்பான்

5)மனித உடலில் மிகவும் தூய்மையான ரத்தம் சிறுநீரகச் சிறையில்தான் இருக்கிறது

6)ஒரு ஜோக்
ஒரு விவாகரத்து நீதிமன்றத்தில் நடந்துக் கொண்டிருந்தது.கணவனிடமிருந்து விவாகரத்துக் கேட்ட பெண்மணியைப் பார்த்து நீதிபதி'உனக்கு உன் கணவனிடமிருந்து மாதம் எவ்வளவு ஜீவனாம்சம் வேண்டும்' என்றார்.அதற்கு அப் பெண்மணி 'எனக்கு ஜீவனாம்சம் எதுவும் வேண்டாம்..என்னை கல்யாணம் செய்துக் கிட்ட போது..நான் எப்படியிருந்தேனோ..அதே போல என்னை விட்டா போதும்' என்றாள்.இதைக் கேட்டுக் கொண்டிருந்த கணவன் 'அது எப்படி முடியும்..இவளைக் கல்யாணம் பண்ணினப்போ அவ விதவையா இல்ல இருந்தா..!!'என்றான்

வாய் விட்டு சிரியுங்க

சுமதி டார்லிங்..உனக்காக என் உயிரையும் கொடுப்பேன்
ஆமாம்..இதையே எவ்வளவோ..தரம் சொல்லிட்டீங்க..ஒரு தரம் கூட செயல்படுத்தலை

2.வீடு கட்டணும்னு கடன் வாங்கினியே கட்டி முடிச்சுட்டியா?
ரூஃப்,அறைகள் எல்லாம் கட்டி முடிச்சுட்டேன்..இன்னும் அஸ்திவாரம் தான் பாக்கி

3.உள்ளொன்று வைத்து புறமொன்று பேசும் வழக்கமில்லை எனக்கு..
பொய் சொல்லாதே..நேற்றுக்கூட வாழிக்காய் பஜ்ஜின்னு சொன்னே..ஆனா உள்ள
உருளைக்கிழங்குதான் இருந்தது.

4.முட்டாள்னு யாரையோ திட்டினியே..என்னையா?
சே..சே..ஊர்ல உன்னைத்தவிர வேற முட்டாளே இல்லையா என்ன?

5.உன்னோட அறிவுதான் டார்லிங் என்னை மயக்கிடுச்சு
நான் உன்னை லவ் பண்றதுக்கும் அதுதான் காரணம்
என்னைப்போல உன்னாலயும் பொய் சொல்ல முடியுதே

6.கள்ளச்சாராயம் விக்கற பக்கிரியின் பொண்ணை பெண் பார்க்க போனியே என்ன ஆச்சு
பொண்ணு எப்படியிருக்கா?
பீப்பாய் மாதிரி இருக்கா.

அன்று ஆணாதிக்கம்..இன்று பெண்ணாதிக்கம்

அக்கிரமம் தலையெடுக்கயில்

அவதரிப்பேன் என்றான்

கீதையில் கண்ணன்

அக்கிரமமும்..அநியாயங்களும் தான்

இன்று நாட்டில்

சொன்னார் போல் அவன் எங்கே?

வாக்குத் தவறிய

அவனும் ஒரு அரசியல்வாதியே!!


2)நிலவை அழைத்து

குழந்தைக்கு

சோறூட்டினாள் அன்னை

நிலவைப் பிடித்து

கறையைத் துடைத்த

முகம் உனது

என்றவன் ஞாபகத்தில் வர..


3)கற்புக்கரசிகளாய்

கண்ணகி

நளாயினி

சீதை

தவிர்த்து யாரேனும்

அறிவாயா நீ

வினவினான் இல்லாளிடம்


4)அன்று

அப்பாவின் கோபம்

அம்மாவின் காது கிழிந்தது

கணவனின் கோபம்

முக வீக்கம் மனையாளுக்கு

இன்றோ

அவளின் கோபம்

நீதிமன்ற வாசலில் ஏறியது

மேடையில் பேசுவது எப்படி..?

நமக்கெல்லாம்..மேடையில் பேச வேண்டும் என்றும்..நாம் பேசுவதை நான்கு பேர் கேட்டு பாராட்ட வேண்டும் என்றும் உள்ளூர ஒரு விருப்பம் இருக்கும்.

பேசுவது என்பதே ஒரு கலை.அதற்காக பேசுவதையெல்லாம் கலை என்று சொல்லிவிட முடியாது.அதுவும்..மேடையில் பேசுவது என்பது...!!! எளிய நடையில் பலர் முன் நின்று மேடையில்..உயர் கருத்துகளைச் சிறந்த முறையில்..கேட்போர் உள்ளத்தில் அழகாக பதிய வைப்பதே ஆகும்.

மேடைப்பேச்சை 'சொற்பொழிவு' என்பர்.சொற்களைத் தேடிப் பிடித்து..எளிய நடையில்..அமைதியாக பொழிவது தான் சொற்பொழிவு.

மழை பொழிகிறது என்கிறோம்....மழை நீர்த் துளிகள்..ஒன்றன் பின் ஒன்றாக சீராக..நேராக..அமைதியாக பெய்வது தான் 'பொழிதல்' எனப்படுவது.அழகாக ஒன்றன் பின் ஒன்றாக வரம்பு மீறாமல் இருப்பதுதான்.வரம்பு கடந்தால் மழை பொழிதலும்..மழை அடித்தல், மழை கொட்டல் என்றெல்லாம் ஆகிவிடும்.

அதுபோலவே தான் சொற்பொழிவும்..வரம்பு கடந்தால்..மக்களிடமிருந்து..கிண்டல்,கத்தல்,திட்டுதல் என்ற நிலைக்கு நம்மை கொண்டு வந்து விட்டு விடும்..

ஒருவர் பேசும் சொற்கள் அனைத்தும் நல்ல சொற்களாக, பண்பட்டவைகளாக இருந்தாக வேண்டும் என்ற கவலை சொற்பொழிவாற்றுவோருக்கு இருக்க வேண்டும்.சொற்கள் பற்றி வள்ளுவன்
சொல்வன்மை என்ற அதிகாரத்தையே வைத்துள்ளார்.

ஆக்கமுங் கேடும் அதனால் வருதலாற்
காத்தோம்பல் சொல்லிங்கட் சோர்வு

ஆக்கமும், அழிவும் சொல்லால் ஏற்படும் என்பதால்..எந்த ஒரு சொல்லிலும் குறைபாடு நேராது கவனமாக இருக்க வேண்டும்...என்கிறார்.

நாம் சொல்வதை பிறர் எளிதாகப் புரிந்துக் கொள்ள வேண்டும்.எவ்வளவு நேரம் பேசினோம் என்பதை விட..நாம் என்ன பேசினோம் என்பது மக்களுக்குப் புரிகிறதா என்பதே முக்கியம்.

நாம் கற்றதை ..பிறர் உணரும் வண்ணம் சொல்லத் தெரியாதவர்..கொத்தாக மலர்ந்திருக்கும் மணமில்லா மலருக்கு ஒப்பாவர்..(யாருக்கும் பயன் தரா மலர்) என்கிறார் வள்ளுவர்.

இணரூழ்த்து நாறா மலரனையர் கற்ற
துணர விரிந்துரையா தார்

ஒருவனின் உண்மைத் தோற்றத்தைக் காட்டுவது அவன் வாய்ச் சொற்களே..மற்ற அனைத்தும் போலித் தோற்றங்கள்.ஆகவே..பிறரிடம் பேசும்போது..அதிலும் குறிப்பாக மேடையில் பேசும்போது மிக விழிப்புடன் இருக்க வேண்டும்..இல்லையேல்..நமக்கு வீழ்ச்சியே ஏற்படும்.

எதைக் காப்பாற்றாவிடினும் நாக்கை காப்பாற்ற வேண்டும்..

யாகாவா ராயினும் நாகாக்க காவாக்கால்
சோகாப்பர் சொல்லிழுக்குப் பட்டு

ஒருவர் எதைக் காத்திட முடியாவிடினும்..நாவையாவது அடக்கிக் காத்திட வேண்டும்.இல்லையேல் அவர் சொன்ன சொல்லே அவரது துன்பத்திற்குக் காரணமாகிவிடும்.

(மேடைப் பேச்சு தொடரும்)

தமிழில் பேச மறுத்த தமிழர்

தமிழன் தமிழ் மாநிலத்தைத் தவிர..வேறு மாநிலங்களில் ஒரு தமிழனைப் பார்த்தால்..உளம் மகிழ்ந்து பேசத் துவங்குவான்..என்றளவில் மகிழ்வேன் நான்..

ஆனால்..ஒரு தமிழன் ..வேறு ஒரு மாநிலத்தில்..தமிழில் கேட்டதற்கு தமிழில் பதில் சொல்ல மாட்டேன் என்று சொல்கிறான் என்றால்..அதுவும் தமிழ்ப்பற்றுள்ள ஒருவன்..

எல்லாம் பதவி படுத்தும் பாடு...

புதுதில்லியில் நிருபர்களிடம் நேற்று மத்திய உள்துறை அமைச்சர் பேசினார்..அப்போது ஒரு நிருபர்..'தமிழக மீனவர்கள் இலங்கை கடற்படையால் தொடர்ந்து தாக்கப் படுகிறார்களே..' என்று தமிழில் கேள்வி கேட்டார்..

அதற்கு சிதம்பரம்..'தமிழில் கேள்வி கேட்கக் கூடாது..அது இங்கு மற்றவர்களுக்கு புரியாது..ஆங்கிலத்தில் கேட்டால் மட்டுமே பதில் சொல்வேன்' என்று அக்கேள்விக்கு பதிலளிக்க வில்லை.

ஆனால்..அதுவே.. இவருக்கே தெரியாத ஹிந்தியில் நிருபர்கள் கேட்ட போது..தன் செயலாளர் உதவியுடன் அவர்களுக்கு பதில் அளித்தார்.

மகாராஷ்டிர மக்களுக்கே மும்பை சொந்தம் என்று கூறுவதை ஏற்க முடியாது..எல்லா இந்தியருக்கும் அது சொந்தம் என்று ஒரு கேள்விக்கு பதிலளித்த அவர்..ஒரு மாநில மொழி..இந்தியா முழுவதிலும் பேசலாம்..அதைத் தெரிந்தவருக்கு.. அந்த மொழியிலேயே பதிலளிக்கலாம் என்ற எண்ணம் இல்லாமல் போனதற்கு என்ன காரணம்.

உண்மையிலேயே..தமிழில் சொன்னால் மற்றவர்க்கு புரியாது..என்ற எண்ணம் ப.சி.,க்கு இருந்திருந்தால்..ஹிந்தி புரியா நிருபர்கள் என்ன செய்வார்கள் என்று அதற்கும் மறுத்து ஆங்கிலத்தில் மட்டுமே சொல்வேன் என்று சொல்லாதது ஏன்?

எல்லாமே பதவிக்குதாண்டா..

தமிழ்(ப்)படம்...இது விமரிசனமல்ல

வலைப்பூ நண்பர்கள் கிட்டத்தட்ட ஒரு மித்த பாராட்டுகளுடன்..சமீப காலங்களில் விமரிசித்துள்ள ஒரு தமிழ் படம்..'ப்' உண்டா இல்லையா என்று இவர்கள் தீர்மானம் செய்யவே நீண்ட நாட்கள் யோசித்திருப்பார்கள் போலும்..இப்படம் வெளியாகியுள்ள அனைத்து திரையரங்கிலும்..அரங்கு நிறைந்த காட்சிகளாகவே இப்படம் ஓடிக் கொண்டிருக்கிறது.கழகக் கண்மணிகளுடன் சேர்ந்து நாமும் இப்படத்தை ஒரு வெற்றி படமாக்குவோம்.இது ஒரு ஸ்பூஃப்படமாம் :-))

மல்லாக்கப் படுத்துக் கொண்டு..காரி உமிழ்ந்திருக்கிறார்கள்.

ஆரம்பம் முதல் இறுதிவரை சிரிப்பு..சிரிப்பு..சிரிப்புதான்..ஓவர்டோஸ் என்று கூட சொல்லலாம்.ஆடையின்றி போவோரைக் கூட பார்த்து சிரிப்பவர்கள் நாம்.

சாதாரணமாகவே..ஒருவர் தெருவில்..வாழைப்பழத்தோலால் வழுக்கி தெருவில் விழுந்தால் கூட..சாதாரண மனிதன் முதலில் சிரிப்பான்..பின்னர்தான் அடிப்பட்டவனுக்கு உதவப் போவான்.கிட்டத்தட்ட இப்பட இயக்குநர் அந்த வேலையைத் தான் செய்துள்ளார்.தமிழ்ப் பட உலகின்..லாஜிக் பற்றி கவலைப் படாத போக்கைக் காட்டி..நம்மை சிரிக்க வைத்திருக்கிறார்.அப்படிப் பார்த்தால்..பெரும் பொருட்செலவில் தயாரிக்கப் படும்..பிரம்மாண்டப் படங்கள், அவை எந்த மொழிப் படங்களாக இருந்தாலும்..அவற்றுள் லாஜிக் இருக்கிறதா?

அமுதனின் இப்போக்கு கண்ணாடி வீட்டிற்குள் இருந்து கல்லெறிவதற்கு சமம்.

முற்றிலும் மாறுபட்ட கதை அமைப்புக் கொண்ட..லாஜிக்குடன் ஒரு வெற்றி படத்தை..அமுதன் கொடுத்து விட்டு..அடுத்து இப்படி ஒரு படம் கொடுத்திருந்தால் கூட ரசித்திருக்கலாம்.அதைவிடுத்து..எல்லோருக்கும் தெரிந்தவற்றையே..அவர் சார்ந்துள்ள துறை பற்றி..கிண்டலுடனும்..கேலியுடனும் சொல்வதை என்னால் ரசிக்க முடியவில்லை.

பார்ப்போம்..அடுத்து இந்த அமுதன் என்ன செய்யப் போகிறார் என்று.

வாய் விட்டு சிரியுங்க..

1.ஊர்ல இருந்து உங்க மாமனார் வர்றதா கடிதம் வந்திருக்குன்னு சொல்றியே..உங்கப்பா ன்னு சொல்லக்கூடாதா?
உங்க சொந்தக்காரர்களைத்தானே உங்களுக்கு பிடிக்கும்.

2.என் கணவர் நடுராத்திரி வந்த திருடனை பிடிச்சுட்டார்...
நடு இரவில் அவர் எப்படி முழிச்சுக்கிட்டு இருந்தார்?
பகலில்தான் ஆஃபீஸ்ல தூங்கிடறாரே!

3.நீதிபதி- (குற்றவாளியிடம்)இந்த திருட்டு குற்றத்திற்கு உனக்கு 10000 ரூபாய் அபராதம் விதிக்கிறேன்..,கட்டத் தவறினால் ஒரு ஆண்டு சிறை தண்டனை
குற்றவாளி-என்னை ஒரு மணி நேரம் வெளியே விடுங்க..அபராதத்தை கொண்டு வந்து கட்டிடறேன்.

4.நோயாளி-(டாக்டரிடம்)டாக்டர் இந்த ஆபரேஷன்ல நான் பிழைப்பேனா?
டாக்டர்-கவலைப்படாதீங்க..உங்களுக்கு செய்யப்போற ஆபரேஷன் புள்ளி விவரப்படி ..பத்தில் ஒருவர் பிழைச்சுப்பாங்களாம்..இது எனக்கு பத்தாவது ஆபரேஷன்..அதனால நீங்க
பிழைச்சுடுவீங்க

5.தந்தை(மகனிடம்) சில்லறை இல்லாம..பஸ்ல வராம...நடந்து வர்றியா?நான்தான் உன் கிட்ட இரண்டு ரூபாய் காயின் கொடுத்தேனே
மகன்-ஆனா..பஸ்ல கண்டக்டர்...இரண்டு ரூபாய் சில்லரையா இல்லாதவங்க ஏறாதீங்கன்னு சொன்னார்.

6.கிரேசி மோகன் எழுதறாப்போல பல காமடி சப்ஜெக்ட் வைச்சிரிக்கேன்..ஆனா ..எழுதத்தான் சோம்பலா இருக்கு..
அப்போ நீங்க லேசி மோஹன்னு சொல்லுங்க.

நான் இந்தியன்

குடியரசு தினம்

சுதந்திர நாள்

கிரிக்கெட்

இவை மூன்று மட்டுமே

நான் இந்தியன் எனும்

நினைவை ஞாபகப்படுத்துகிறது

மாநில மொழி

வெறியர்களுக்கு

2) வியர்வை முத்து சிந்தி

விவசாயி விளைவித்த நெல் முத்துக்கள்

பண்ணை வீட்டு பத்தாயத்தில்

3)கவர்ச்சி காட்டி நடிகை

ஆண்களின்

உள்ளாடை விளம்பரத்தில்

4) பொழுது போக

வாங்கிய தொலைக்காட்சி

தொல்லைக்காட்சியாய்

பொழுதை விழுங்கிக் கொண்டிருக்கிறது

தேங்காய்..மாங்காய்..பட்டாணி..சுண்டல்(29-1-10)

நமது உடலில் ஏழு வகை சுரப்பிகள் வெளியிடும் திரவம் ரத்தத்தில் கலந்து வாதம்,பித்தம்,சிலேத்துமம் ஆகிய மூன்று நாடிகளை இயக்குகிறது.இதன் மூலம் உடலுக்குத் தேவையான புரதம்,கொழுப்பு,மாவு சத்துகளை சமப்படுத்தி..சீரான வெப்ப நிலையில் நமது உடலை ஆரோக்கியமாக பாதுகாத்து வருகிறது.

2)ஜோதி பாசுவின் மறைவிற்குப் பின் 1964ல் மார்க்சிஸ்ட் கட்சியை உருவாக்கிய அத்தனை பொலிட் பீரோ உறுப்பினர்களையும் அக்கட்சி இழந்து விட்டது.23 ஆண்டுகள் முதல்வராய் இருந்த பாசு அதிகாரத் தோரணையோ..மமதையோ இல்லாதவராகத் திகழ்ந்தார்

3)ஒவ்வொன்றிற்கும் ஒரு சீசன் உண்டு.மாம்பழ சீசன்,பண்டிகை சீசன்,ஆடித் தள்ளுபடி சீசன்,சங்கீத சீசன் இப்படி..ஆனால் ஆண்டவனுக்கு சீசன் என்று நாம் கேள்விப் பட்டதில்லை.அதையும் சமீபத்தில் வந்த பத்திரிகை செய்திகள் சொல்லி விட்டன.சபரிமலை சீசனில் வசூலான உண்டியல் தொகை 119 கோடி ரூபாய் என்று செய்தி வெளி வந்துள்ளது.

4)இதுவரை இவர் 28 முறை சிறை சென்றுள்ளார்..நான்காண்டு காலம் சிறையில் கழித்துள்ளார்.அதிகக் காலம் சிறையில் இருந்த திராவிட இயக்கத் தலைவர் இவர் ஒருவரே! அவர் தான் வைகோ ஆவார்

5)ஒவ்வொரு குடியரசு தினத்திற்கும் சிறந்த தொண்டாற்றியவர்களுக்கு 'பத்ம' விருதுகள் வழங்குகிறது.இப்படிப்பட்ட விருதுகள் 1954 முதல் இந்திய அரசு வழங்கி வருகிறது.முதன் முதலில் ராஜாஜி,குடியரசு துணைத் தலைவராய் இருந்த ராதாகிருஷ்ணன்,சி.வி.ராமன் ஆகியோருக்கு பாரத ரத்னா விருது வழங்கப்பட்டது.

6) ஒரு ஜோக்..

தலைவர்- அடடா..என்ன வெயில்....தாங்க முடியல
நிருபர்- அப்போ..உங்களுக்கு பிடித்த பருவம் எது
தலைவர்-16 வயது முதல் 24 வயது வரை

திருமணங்களும்..அழைப்பிதழ்களும்

நம் வீட்டுத் திருமணங்களுக்கு நெருங்கிய உறவினர்களையும்...நம் நண்பர்களையும் அழைப்பதில் தவறில்லை.ஆனால் அதிகம் அறிமுகம் இல்லாத..அல்லது..திருமணமாகும் மணமகள் குடும்பத்திற்கோ,மணமகன் குடும்பத்திற்கோ சற்றும் தெரியாத ஒருவருக்கு அழைப்பிதழ் கொடுப்பது வீண் என்றே எண்ணுகிறேன்.

உதாரணத்திற்கு..சென்ற வாரம் என் நண்பர் ஒருவர்..அவரது தம்பி மகள் திருமணத்திற்கு எனக்கு அழைப்பிதழ் கொடுத்திருந்தார்.எனக்கு அவரது தம்பியையோ..அவர் குடும்பத்தினரையோ தெரியாது.

ஆயினும்..அழைப்பிதழ் கொடுத்தவர் என் நண்பர்..திருமணத்திற்கு போகவில்லையெனில் தப்பாய் எண்ணிவிடப் போகிறாரே என்று போனேன்.நண்பர் பெண்ணின் பெரியப்பா என்பதால்..மணமேடையில் மிகவும் சுறுசுறுப்பாக செயல் ஆற்றிக் கொண்டிருந்தார்.நான் எப்பொதும் சங்கோஜி..பேருந்தில் கூட சப்தம் போட்டு நடத்துநரிடம் பயணச்சீட்டு வாங்க மாட்டேன்.நடத்துநருக்கு நான் இரண்டுமுறை கேட்டால் தான் காதில் விழும்..அந்த அளவிற்கு மென்மையாகப் பேசக்கூடியவன்.

கல்யாண வீட்டில் யாரையும் தெரியாததால்..ஒரு ஓரத்தில் இருந்த நாற்காலியில் அமர்ந்தேன்.அங்கு ஒவ்வொருவரும்..அடுத்தவரிடம் பேசிக்கொண்டும்..சிரித்துக் கொண்டும் இருந்தனர். எனக்கு உள்ளூர பயம்..யாராவது வந்து..பையன் வீட்டிற்கு சொந்தமா..பெண் வீட்டு சொந்தமா என்று கேட்டு விடுவார்களோ என்று.

அந்த பயத்திலேயே..காஃபி கொண்டுவந்து கொடுத்துக் கொண்டிருந்தவரிடம் கூட காஃபி வேண்டாம் என்று சொல்லிவிட்டேன்..அப்படிப்பட்டவன் போய் டிஃபன் எங்கே சாப்பிடப் போகிறேன்.

நூறு ரூபாய் மொய் எழுதிவிட்டு..சாப்பிடப் போகலாம் என்று நினைத்தேன்.ஓட்டலில் சாப்பிட்டால் கூட நூறு ரூபாய் ஆகாதா என்று மனம் கணக்குப் போட்டது.

தாலி கட்டி முடிந்ததும்..தைரியத்தை வரவழைத்துக் கொண்டு..மேடையில் ஏறி நண்பரைப் பார்த்து கை கொடுத்துவிட்டு மொய் கவரை திணித்தேன்.நண்பர் மணப்பெண்ணிடம் என் பெயரைக் கூறி அறிமுகப் படுத்தினார்.'ஆமாம்..இவனை எல்லாம் தெரிந்து வைத்துக் கொண்டு என்னவாகப் போகிறது'என்று அந்தப் பெண் மனதில் எண்ணியபடியே..அரை சென்டிமீட்டர் வாயை அகற்றி என்னைப் பார்த்து புன்முறுவல் செய்தாற் போல இருந்தது.

பின் நண்பர் கண்டிப்பாய் சாப்பிட்டுட்டுப் போங்க..என்றார்.

சரி என தலையாட்டிவிட்டு..தனியாக டைனிங் ஹால் போக தயங்கி..வேகமாக வெளியே வந்து செருப்பை மாட்டிக் கொண்டேன்.(நல்ல வேளை..செருப்பு காணாமல் போகவில்லை)

நேரே அருகில் இருந்த ஓட்டலுக்குப் போனேன்..சாப்பிட்டேன்..இன்று மதிய சாப்பாடு இரு நூறு ரூபாய் என்று மனதில் எண்ணிக் கொண்டேன்..

வீட்டில்..கல்யாணத்திற்கு போனீங்களே தாம்பூலப் பை எங்கே என்று கேட்டால் என்ன செய்வது..என்று தெரியவில்லை..கல்யாணப் பரிசு பைரவன் கதையாய் இருந்தாலும் பூமாலையை கடையில் வாங்கிக் கொண்டு போகலாம்..தாம்பூலப் பைக்கு எங்கே போவது..

கண் தானம் - 2

பிறந்த நாள் முதல்

கண்கள் பார்க்கின்றன

அவை படிக்கின்றன


அறிவாளி ஆக்குகின்றன



முட்டாளின் மூளைக்கும்

தெரிவிக்கின்றன செய்திகளை

படிக்காதவனுக்கும்

நிழற் படங்களைக்

காண வைக்கின்றன

கால வரையன்றி

காரண்டி வழங்கியுள்ளாள்

இயற்கை அன்னை

நயனங்களுக்கு

நமக்குப் பின்னரும் - அவை

நலமாய் வாழட்டுமே!

இளையராஜாவிற்கு பத்மபூஷன் கிடைக்க நானே காரணம்

அன்பு உடன்பிறப்பே

தமிழன் இளையராஜாவிற்கு பத்மபூஷண் விருது கிடைத்துள்ள செய்தியை நீ அறிந்திருப்பாய்.ஆனால் அதன் பிண்ணனி என்ன வென்று உனக்கு சொல்ல வேண்டியது என் கடமை என்பதால் இந்த மடலை எழுதிகின்றேன்.

என் உடல்நிலை இதற்கு இடம் கொடுக்கவில்லை..உண்மையைச் சொல்வதானால்..இன்று படுக்கையைவிட்டுக் கூட என்னால் எழுந்துக் கொள்ளமுடியவில்லை.அளவிற்கு அதிகமாக ஐந்து மணி நேரம் அதிகமாகவே உறங்கிவிட்டேன்.ஆனாலும்..இளையராஜா விருது விஷயத்தில் வரலாற்றுப் பிழை ஏற்பட்டுவிடக் கூடாதே என்றே..அதுவும் ஒரு தமிழனுக்கு விருது என்ற போது உடல்நிலையையும் பாராது இம்மடல் வரைந்தேன்.

என் கண்மணியே...அவருக்கு விருது வழங்கக்கோரி..32 கடிதங்கள் குடியரசுத் தலைவர்க்கு எழுதியுள்ளேன்..ஏன் பிரதமருக்குக் கூட 40 தந்திகள் அனுப்பியுள்ளேன்.என் வேண்டுகோளை..அன்னக்கிளி வந்த நாள் முதல் விடாது கேட்டு வருகிறேன்.என் மௌன அழுகையை புரிந்துக்கொண்டு..என் வேண்டுகோளைகுடியரசுத் தலைவர் ஏற்று..தம்பி இசைஞானி இளையராஜாவிற்கு இவ்வாண்டு பத்மபூஷண் விருதை வழங்கியுள்ளார்.

எதிர்க்கட்சியினர் அவர்களால் தான் இது நடந்தது என்று சொல்லக்கூடும்..ஆனால் உண்மையை நீயும்..நானும் மட்டுமே அறிவோம்.

எதிர்க்கட்சியினருக்கு ஒன்று சொல்லிக் கொள்ள ஆசைப்படுகிறேன்..என் தேங்காய்..மாங்காய்..பட்டாணி..சுண்டல் 22-1-10 அன்றைய இடுகையைப் பாருங்கள்..அதில்;இளையாராஜாவிற்கு விருது வழங்கப்படவில்லை என்ற என் ஆதங்கத்தைத் தெரிவித்திருந்தேன்..அது குடியரசுத் தலைவர் காதிற்கு எட்டியிருக்கிறது.

அதில் இப்படி நான் சொல்லியதை அறிந்த குடியரசுத் தலைவர் உடனே இளையராஜாவிற்கு இவ்வாண்டு விருதை வழங்கியுள்ளார்.

இத்துடன் சேர்த்து தம்பி ரஹ்மானிற்கும் இவ்விருது கிடைத்ததற்கு என் மகிழ்ச்சிக்கு அளவே இல்லை.ஆஸ்கார் தம்பிக்கு கிடைத்த போதுக் கூட நான் இவ்வளவு மகிழ்ச்சி அடையவில்லை.இது நமது சமத்துவ கொள்கையை உணர்த்துவதை உண்மை அறிந்தவர் உணர்வர்.

டிஸ்கி- நான் அரசியலில் இருந்தால் இப்படியெல்லாம் சொல்லியிருப்பேன்..அதற்கு வழியில்லாமல் போய் விட்டது.

கண் தானம்

கடைசியாய் செயலிழக்கும்

உறுப்பு கண்தானாம்

ஏட்டில் படித்ததுண்டு

நிரந்தரமாய் கண்மூடிவிட்ட என்னை

இடுகாட்டிற்கு எடுத்துப் போகையில்

என் இழப்பு யார் யாரை

பாதித்துள்ளது என

பார்க்க விரும்புகையில்

கும்மிருட்டு

ஒன்றுமே தெரியவில்லை

இறந்ததும் கண்களை தானம் செய்தனராம்

யாரோ சொல்வது

திறனிழந்துக் கொண்டிருக்கும்

செவியில் மெலிதாகக் கேட்கிறது

வாய் விட்டு சிரியுங்க..

1.நம்ம ராமு மனைவி எதிலும் மந்தமாதான் இருப்பா..
அவ பேர் என்ன
'சுலோ 'சனா

2.தினமும் மாலை 6 மணிக்கு என் வாய்க்கு வந்தபடி மனைவியை திட்டுவேன்
அதென்ன 6 மணி கணக்கு
அப்போதானே அவ ஷாப்பிங்க்னு வெளியே போவா..

3.சுதந்திரம் எப்ப கிடைச்சுது
2009 மார்ச் 10ஆம் தேதி
என்ன சொல்ற நீ
அன்னிக்குத்தான் என் மனைவி கோவத்தில பிறந்த வீட்டுக்கு போனா..

4.என் மனைவி கிட்ட எனக்கு பிடிச்சதே அவளோட பொய் சொல்லாத குணம்தான்..
இல்லையே...நேற்றுகூட என் மனைவிகிட்ட 'என் புருஷன் அழகுன்னு' சொன்னாளாமே

5.மகன்-அம்மா..சின்ன வயசில அப்பாவை காதலிச்சு கல்யாணம் பண்ணின்டியா?
அம்மா- ஆமாம்..அதுக்கென்ன இப்ப
மகன்- அப்பவும் அப்பாவுக்கு இதே முகம் தானே ..இதைப்போய்...

6.என் மனைவி வெயில்ல நான் போய் வந்ததும் அன்பா லைம் ஜூஸ் கொடுத்தா..
ஓகோ...காலைல ஒரு முழு லைம் சாக்கடைல கிடந்தது..அதைக்காணோமேன்னு பார்த்தேன்.

தர்மம்

அந்தணர்க்கு

ஆடை, தட்சணை

நுனிவாழை இலையில்

சோறு..பொரியல்..கூட்டு

வடை பாயாசம் என

தந்தையின் திதி

செய்து முடித்து

சாப்பிடுகையில்

அம்மா பசிக்குது

சாமி தருமம் - என

வாசலில் ஒலிக்கும் குரலை

விரட்டுகிறான்

இடது கையால்

போ..போ..என

தேங்காய் மாங்காய் பட்டாணி சுண்டல் (22-1-10)

திருப்பதி வெங்கடாசலபதிக்கு விலை மதிப்பற்ற 36 வகை தங்க, வைடூரிய,வைர ஆபரணங்கள் சொந்தமாக இருக்கிறதாம்..

2)வறியவர்,இயலாதவர்,முற்றிலும் ஆதரவு நாடுவோர் வடிவங்களில் நான் இறைவனைக் காண்கிறேன்.அவர்களுக்கு உதவுவதுதான், இறைவனால் படைக்கப் பட்ட ஒவ்வொரு உயிரிடத்திலும் அன்பு செலுத்துவது தான் நான் கடைபிடிக்கும் உண்மையான கடவுள் வழிபாடு ..என்கிறார் நடிகர் சிவகுமார்

3)கலைஞர் அரசியலில் இருந்து ஓய்வு பெறப்போவதாகக் கூறியது பற்றிக் கேட்டபோது..அழகிரி ஒரு பேட்டியில் கூறியது 'கலைஞரின் பணிக்கு என்றைக்குமே ஓய்வு கொடுக்க முடியாது.எல்லாவற்றையும்
விட்டு அவர் விலக நினைத்தாலும் கூட காத்திருக்கும் கடமைகள் அவரை விலக விடாது' என்றுள்ளார்.(காத்திருக்கும் கடமைகள் என்று எதைச் சொல்கிறார்)

4)இசை வரலாற்றில் புரட்சி செய்து..சிம்பொனி,கீர்த்தனைகள் எழுதி..இசையமைப்பாளர்களின் இசையமைப்பாளர் இளையராஜாவிற்கு இதுவரை மத்திய அரசு எந்த விருதும் அளித்து கௌரவிக்கவில்லை.

5)முரண்பாடு..வேறுபாடு இரண்டிற்கும் ஒரே அர்த்தமா? என்றால் இல்லை என்று தெரிகிறது.
முரண்பாடு என்பது தண்ணீரும்..எண்ணெய்யும் கலந்தது மாதிரி சேராது..வேறுபாடு என்பது தண்ணீரும்..பாலும் போல..சேர்ந்து விடும்...இப்படி விளக்கம் சொன்னவர் கலைஞர்

6)நண்பன் எனப்படுபவன் யார்? நம்மிடம் எந்தவித எதிர்ப்பார்ப்பும் இன்றி பழகக்கூடியன் தான் நண்பன்

7)ஒரு ஜோக்

நடிகர்-தலைவரே! இன்று என்னோட படம் நூறாவது நாள் கொண்டாட்டம்..நீங்க அவசியம் விழாவிலே கலந்துக் கொள்ளணும்
தலைவர்- எந்த தியேட்டர்ல 100 நாள் ஓடியிருக்கு
நடிகர்-என் 'ஹோம்' தியேட்டர்ல

அடமானம்

வெளியே

வட்டிக்கு வாங்கி

வீடு கட்டாதே என்கிறது

வங்கி விளம்பரம்

வந்திடு என்னிடம்

நானே தருகிறேன்

தொலைபேசியில் கூப்பாடு

நாள் தோறும்

வந்தது வினை - என்

தலை ஆட்டுதலால்

வங்கிக் கடனில்

வாங்கிய வீடு மட்டும்

அடமானத்தில்

மூழ்கிடாதா!!!

கொஞ்சி விளையாடும் தமிழ் - 12

காதலன்..காதலி..ஒரு மாலை நேரம்....அருவி சலசலத்து ஓடும் மனத்திற்கு ரம்மியமான சூழலில் சந்திக்கிறார்கள்..காதலில் மூழ்கியிருக்கும் வேளையில் ..உணர்ச்சி வசப்பட்டு..உடலுறவு கொண்டு விடுகிறார்கள்.சாதாரணமாக காதலர்களுக்கு நிலவு சாட்சியாக அமைவதுண்டு.இங்கு அதுவும் இல்லை.

காதலன் பிரிந்து செல்கிறான்..ஆனால் அவளோ தவறு செய்து விட்டதாக நினைக்கிறாள்.நாளைக்கு ஏதேனும் விரும்பத்தகாதது நடந்தால் சாட்சி சொல்லக் கூட யாரும் இல்லை.இழப்பின் வெளிப்பாடை
குறிஞ்சி நிலப் பெண் பாடுவது போல அமைந்துள்ளது இப்பாடல்.

யாரும் இல்லைத் தானே கள்வன்
தானது பொய்ப்பின் யானெவன் செய்கோ
தினைத்தாள் அன்ன சிறுபசுங் கால
ஒழுகுநீர் ஆரல் பார்க்கும்
குருகும் உண்டுதான் மணந்த ஞான்றே
(கபிலர் - குறுந்தொகை 25)


தவறு நடந்து விட்டது..அப்போது யாரும் இல்லை அந்தத் திருடன் (காதலன்) மட்டும் தான் இருந்தான்.நாளை நான் இல்லை என அவன் பொய் உரைத்தால் நான் என்ன செய்வேன்.நாங்கள் கூடிய போது தினையின் தாளைப்போன்ற சிறிய கால்களுடன் ஆரல் மீனுக்காக ஓடும் நீரில் காத்திருந்த கொக்கு மட்டுமே இருந்தது என்கிறாள். கொக்கு மட்டுமே சாட்சியாம்.

இப்பாடல் குறுந்தொகையில் கபிலர் இயற்றிய பாடல்.

நான் அகங்காரம் கொண்டவனா?

நான் அகங்காரம் கொண்டவனா? என்பதைச் சொல்லுமுன்..அகங்காரம் என்றால் என்ன..என்று பார்ப்போம்..

அகங்காரம் நல்லதல்ல..அகங்காரம் இயற்கைத் தன்மையிலிருந்து மாறு பட்டது.எல்லோரிடமும் சகஜமாகப் பழகாமல்..நெருக்கமாக உணராமல்..மற்றவர்களிடமிருந்து நான் வித்தியாசமானவன் என்று எண்ணுவதே அகங்காரம்.

நான் மற்றவர்களைவிட உயர்ந்தவன்..அடுத்தவரும் நம்மில் ஒருவர் என்று உணராததே அகங்காரம்.

அகங்காரம் பிடித்தவன்..அன்பு,நட்பு எல்லாம் விரைவில் காணாமல் போய்விடும்.உயர்ந்தவர்..தாழ்ந்தவர் என எண்ணாது அனைவரையும் நம்மைப் போல எண்ணினாலே அகங்காரம் நம்மை விட்டு அகன்று விடும்..

நான் இந்த இடுகைக்கு இப்படிப்பட்ட தலைப்பு கொடுத்ததற்குக் காரணம்..

'கவிதை என்றால் இது கவிதை' என்ற என் இடுகைக்கு மணிகண்டனிடமிருந்து வந்த பின்னூட்டமே..அந்த பின்னூட்டம் வருமாறு

''மணிகண்டன் said

//என்ன இப்படி ஒரு தலைப்பு..கவிஞருக்கே உரிய அகங்காரமா...//"

கண்ணதாசனின் பாடல் வரிகள் ஒன்று..'தெய்வம் என்றால் அது தெய்வம்..வெறும் சிலை என்றால் அது சிலை தான்'

அதை நினைத்தே..'கவிதை என்றால் இது கவிதை..இல்லை என்றால் இது (கவிதை) இல்லை" என்று இத் தலைப்பைக் கொடுத்தேன்.

நான் எண்ணியபடியே பிறரும் எண்ணுவர் என்று எண்ணியது என் தவறே!!

பாதாம் அல்வா...

மாத முதல் நாள்

கை நிறைய

காந்தி சிரிக்கிறார்

மாதக் கடைசி நாள்

வேக வேகமாக

வேர்த்து கொட்ட வந்து

கல்லூரிக் கட்டணம்

கட்டிய

அன்புத் தந்தை

அண்ணலில் தெரிகிறார்.


2)பழுத்த இலையாய் பெற்றோர்

மலர்ந்த பூவாய் இல்லாள்

மலரத் துடிக்கும் மொட்டாய் மகள்

தோட்டக்காரனாய் நான்


3)பாதாம் அல்வா

சாப்பிட்டபடியே

நெய் ரோஸ்ட்

போண்டா ஆர்டர் செய்கையில்

ஒரு காஃபி மட்டும்

என்கிறான் எதிராளி

என் தட்டை நோக்கியவாறு

வயிறில் லேசான வலி

பொங்கலுக்கு நான் பார்த்த படம்- விமரிசனம்

ஒவ்வொருவரும் பொங்கல் வெளியீடு படங்களைப் பார்த்து...தங்கள் விமரிசனங்களை பதிவில் ஏற்றிக் கொண்டிருக்க..ஊரோடு என்றும் சேர்ந்து வாழும் நான் அப்படி செய்யாதது மன வருத்தத்தைக் கொடுக்க..நான் காணும் பொங்கலன்று கண்ட படத்தை விமரிசிக்கிறேன்..

விஜய் டி.வி.யில் சனிக்கிழமை 10 மணிக்கு பிரகாஷ் ராஜிற்கு தேசிய விருது வாங்கிக் கொடுத்த .'காஞ்சிவரம்' படம் ஒலி/ஒளி பரப்பானது.அப்படத்தை முன்னர் நான் பார்க்காததால்..இப்போது பார்க்க தீர்மானித்தேன்.இது என்ன தீர்மானிப்பது என்கிறீர்களா..பின்னே இல்லையா..இரண்டு மணி நேர படம்..நான்கு மணி நேரம் ஓடியது என்றால்...அதைப் பார்த்த நான் பொறுமைத் திலகம் அல்லவா?

நடுநடுவே ஐந்து நிமிடத்திற்கு ஒரு விளம்பர இடைவேளை..அடுத்து ஐந்து நிமிடத்திற்கு பிரகாஷ் ராஜ் பேச்சு..இப்படி நான்கு மணி நேரம் இடை இடையே படம் ஓடியது.

ஏழை நெசவாளிகள்..கம்யூனிசம் வருவதற்குமுன்..முதலாளித்துவத்தால் பட்ட துன்பங்களைப் படம் சொல்கிறது.பட்டு சேலை நெய்யும் ஒரு நெசவாளி..தன் திருமணத்திற்கு மனைவிக்கு பட்டு சேலை எடுக்க நினைக்க..அது முடியாது..தன் மகள் திருமணத்திற்குள் மகளுக்கு பட்டு சேலை எடுத்துவிடுவேன் என்கிறார்.அதற்காக தினசரி பட்டு நூலை சிறிது சிறிதாகத் திருடி..வீட்டில் மறைவான இடத்தில் தறி போட்டு நெய்கிறார்.இந்நிலையில் மனைவியின் மரணம் நேருகிறது.இதற்கிடையே..கம்யூனிச எழுத்தாளரை சந்திக்க..இவர் மனமும் அதை நாட..நெசவாளிகள் கோரிக்கைகளை எழுப்பச் சொல்லி தலைமை தாங்குகிறார்.ஒரு நாம் இவர் நூலைத் திருடிப் போகையில் மாட்டிக் கொண்டு சிறை செல்கிறார். அதனால் மகளுக்கு நடக்க இருந்த மணம் நின்று போகிறது.மகள் நோய் வாய்ப்பட ..பரோலில் வரும் அவர்..தன் கையால் மகளுக்கு விஷச் சோறு ஊட்டி..அவள் பிணத்தின் மீது..அதுவரை அரைகுறையாய் நெய்த பட்டை போர்த்துகிறார்.

பின்னர் நெசவாளிகளுக்கென Co op. society 1950ல் உருவானது என்ற கேப்ஷனுடன் முடிகிறது.

இப்படத்தில் பிரகாஷ்ராஜ் நடித்ததை விட அற்புதமாக பல படங்களில் நடித்துள்ளார்.சமயங்களில் முன்னர் கொடுக்க முடியாது விடுபட்டால்..பின்னர் ஒரு நாள் வேறு எதற்காவது கொடுப்பது வழக்கம்.அப்படித்தான் இதற்கும் என்றே தோன்றுகிறது.

Starring: Prakash Raj, Shreya reddy

Direction: Priyadarshan

Music: M. G. Sreekumar

Production: Shailendra Singh

தேங்காய் மாங்காய் பட்டாணி சுண்டல் (15-1-10)

இலக்கியத்தில் மிகப் பெரிய விருதான சாகித்திய அகாடமி விருது பெற்றவர்களில் திருநெல்வேலியைச் சேர்ந்தவர்கள் அதிகம்.தோப்பில் முகமது மீரான்,தி.க.சி.,கி.ரா.,ரா.பி.சேதுப்பிள்ளை,வல்லிக்கண்ணன் ஆகியோர்.தாமிரபரணி தண்ணீர்...

2)தமிழின் சிறப்பு ஒன்று..பூ, மலர் இரண்டு தமிழ் வார்த்தைகளில் எதைச் சொல்லிப் பார்த்தாலும் சொல்வதற்காக வாய் திறக்கும் போது நம் உதடுகள் பூ மலர்வது போல மலர்ந்து விரியும். ப.,ம., இரு எழுத்துகளையும் உதடு மலராமல் சொல்ல முடியாது.

3)எங்கேயோ படித்தது...பெண்கள் சமுதாயத்தில் விதை நெல்லைப் போன்றவர்கள்.வரும் தலைமுறைகளை நன்றாக பயிர் செய்ய வேண்டியவர்கள்.

4)துபாயில் கலீபா டவர் என்ற கட்டிடம் சமீபத்தில் திறந்து வைக்கப்பட்டது.இதுதான் உயரமானக் கட்டிடமாக சொல்லப் படுகிறது.828 மீட்டர் (2717 அடிகள்) உயரமுள்ள இதை 21-9-04 கட்ட ஆரம்பித்து..1-10-09 அன்று முடித்தனராம்.12000 ஊழியர்கள் 22 மில்லியன் மணிநேரங்கள் வேலை செய்து கட்டி முடித்துள்ள இக்கட்டிடத்திற்காக 31400 மெட்ரிக் டன் இரும்பு தேவைப்பட்டதாம்.

5)மின்விசிறி ஒடத் தொடங்கிவிட்டால் அதிலுள்ள பிளவுகள் மறைந்து ஒரே சுழற்சி வட்டம் தான் தெரிகிறது.ஒரு செயலும் இன்றி உழைப்பு முடங்கிக் கிடக்கும் போது தான் உலகம் பெரிய துன்பங்களும்,மிகுந்த கவலைகளும் உள்ள இடமாகப் பிளவுப் பட்டுத் தெரிகிறது.உழைப்பு ஒரு நல்ல மருந்து.அதில் மனப்புண்களும்,கவலைகளும் ஆறுகின்றன.சோர்வும்,தளர்வும் ஒடுங்கி விடுகின்றன.

6)பண்டைத் தமிழர்களின் காலக் கணிப்பீட்டு முறை மிகவும் நுட்பமானது.வைகறை,காலை,நண்பகல்,எற்பாடு,மாலை,யாமம் என்று ஒரு நாளை ஆறு சிறு பொழுதுகளாக்கி..ஒரு நாளுக்கு அறுபது நாழிகைகள் எனப் பகுத்துக் கொண்டனர்.அதாவது அந்த ஆறு சிறு பொழுதுகள் கழிய அறுபது நாழிகைகள் எடுக்கின்றன.ஒரு நாழிகை 24 நிமிடங்கள்..60 நாழிகைகள் 1440 நிமிடங்கள் அதாவது 24 மணி நேரம் ..ஒரு நாள்.

7)சமீபத்தில் முடிவடைந்த 33ஆம் புத்தகக் காட்சியில் வாசகர்களின் அதிகக் கவனத்தைக் கவர்ந்த புத்தகங்களில் முதலிடத்தை..ரகோத்தமன் எழுதிய 'ராஜீவ் காந்தி கொலை வழக்கு' பெற்றுள்ளதாக..ஒரு பத்திரிகைக் குறிப்பு சொல்கிறது.

8)ஒரு ஜோக்

உதவி இயக்குநர்-(இயக்குநரிடம்) நம்ம பட பூஜை அன்னிக்கே..நம்ம கதை டிவிடி வேற லேங்குவேஜ்ல வெளிவந்து விட்டது
இயக்குநர்- இரைந்து பேசாதே..அதைத்தான் இப்ப நாம் காபி யடிச்சு தமிழ்ல எடுக்கிறோம்

என்டர் தட்டா கவிதைகள்

என் ஆணவத்தை
அடக்குகிறது
உன் மௌனம்

2)உன் முகம்
நாணத்தால் சிவக்கையில்
பிறக்கின்றன ஆயிரம் கவிதைகள்

3)முதலும் முடிவும் தெரியா
சிக்கல் விழுந்த நூல்கண்டு
வாழ்க்கை

4) நிர்வாணமாய்
நின்று கொண்டிருக்கின்றன
இலையுதிர்கால மரங்கள்

5)நிமிடத்திற்கு நிமிடம்
உரு மாற்றிக்கொள்ளும்
பச்சோந்தி மேகங்கள்

6)முதியோர் இல்லத்தில் தாயிடம்
விடைபெறுகையில்
பார்த்துப் போ என்கிறாள்

7) தாங்க இயலா வேதனை
துக்கம்
உடல்வலி
மனவலி
அனைத்தும் போக்கும்
மந்திரச் சொல்
அம்மா.

வாய் விட்டு சிரியுங்க..

தயாரிப்பாளர்-பொங்கல் படங்களிலேயே உங்க படம் தான் பார்க்கிறார் போல இருக்கு
நடிகர்-அப்படியா
தயாரிப்பாளர்-ஆமாம்..மற்ற தியேட்டர்களில் எல்லாம் மக்கள் கூட்டம்தான் பார்க்க முடியுது.உங்க பட தியேட்டர்ல தான் யாருமில்லை

2)தலைவர் சுடுகாட்டில என்ன பண்றார்..
அவர் ஜலதோஷத்திற்கு ஆவி பிடிக்கச் சொன்னாராம் டாகடர்..அதைத்தேடிக்கிட்டு இருக்கார் பிடிக்க

3)தலைவர் போலீஸ் நிலயத்திற்கு எதற்குப் போனார்..
அவரது துணைவியின் கொடுமை தாங்கலையாம்

4)தயாரிப்பாளர்-ஒவ்வொருவர் தன் படம் ஓட போட்டியெல்லாம் வைக்கறாங்க..அது போல நாமும் ஒரு போட்டி வைக்கலாம்
இயக்குநர்-என்ன போட்டி வைக்கலாம்
தயாரிப்பாளர்-நம்ம படத்தின் கதை என்னன்னு கண்டுபிடிக்கறவங்களுக்கு பரிசு கொடுக்கலாம்

5)துறவி 1- நீங்க துறவியானதற்கு காரணம்
துறவி 2-.........நடிகரைப் போட்டு படமெடுத்தது தான் காரணம்..ஆமாம்..நீங்க..
துறவி1- என்னை உங்களுக்குத் தெரியல..அந்த படத்தை இயக்கியவன் நான்

6)நிருபர்-மக்களுக்கு உங்கள் பொங்கல் செய்தி..
தலைவர்-என்னை எதிர்ப்பவர்கள் நாசமாய் போவார்கள்..கெட்டு அலைவார்கள்..நாட்டை விட்டு ஓடுவார்கள் என்ற என் பொங்கல் வாழ்த்தை மக்களுக்கு தெரிவித்துக் கொள்கிறேன்

7)அந்த மருத்துவர்தான் தலைவரின் கரத்தை பலப்படுத்தியவர் என்கிறார்களே
ஆமாம்..தலைவரின் கை எலும்பு முறிந்த போது அவர்தான் சிகிச்சை செய்தாராம்.

இனிய பொங்கல் வாழ்த்துகள்

திணைத்துணை நன்றி செயினும் பனைத்துணையாக்
கொள்வர் பயன்தெரி வார்

ஒருவர் தனக்கு செய்த சிறு உதவியையும் பெரிய உதவி ஒன்றாகக் கருதுவது தமிழனின் பண்பு.இது அவனுடனே பிறந்த குணம் எனலாம்.(அதனால்தான் அவனை எளிதாக ஒருவரால் ஏமாற்ற முடிகிறது என்பது வேறு விஷயம்)

தட்சிணாயனம் என்ற தனது தென்திசைப் பயணத்தை முடித்துக் கொண்டு சூரியன் வடதிசை நோக்கி தன் உத்தராயணப் பயணத்தை மேற்கொள்ளும் நாள் தை முதல் நாள்.

சாதி மதங்களை மறந்து சமத்துவம் வளர்க்கும் பண்டிகை பொங்கல்.பிற பண்டிகைகள் ஒரு குறிப்பிட்ட மதத்தையோ,இனத்தையோ மையமாகக் கொண்டு நடைபெறுவது.ஆனால் உழைப்பையும்,இயற்கையையும் மையமாக வைத்து வழிபடும் ஒரே பண்டிகை பொங்கல் மட்டுமே! தமிழர்கள் எங்கெங்கு உள்ளனரோ அங்கெல்லாம் பொங்கல் உண்டு.

உயிர் வாழ தேவையான உணவுப் பொருள் அரிசி.அது .. சூரியன், பூமி, மழை,காற்று ..ஆகிய இயற்கையின் கொடையால் கிடைக்கிறது.(கரும்பு,இஞ்சி,மஞ்சள்,காய்கறிகள்,பருப்பு ஆகிய பொங்கல் தேவைகளையும் இயற்கை அளிக்கிறது)

நம் வாழ்வில் வளம் அளிக்கும் அந்த இயற்கையை வழிபடும் தினமே பொங்கல்.

அரிசியை விளைவிக்கும் விவசாயிக்கு பெரிதும் உதவி..மனிதனுக்கு தேவையான அரிசியை தந்துவிட்டு...அதிலிருந்து கிடைக்கும் தவிட்டையும்..கடலை,எள் ஆகியவற்றிலிருந்து எண்ணெய்யை மனிதனுக்குக் கொடுத்து விட்டு..அவற்றிலிருந்து கிடைக்கும் சக்கையான தவிடு,புண்ணாக்கு ஆகியவற்றை தான் உண்ணும் தியாக உருவங்கள் மாடுகள்.அந்த மாடுகளையும்...மாட்டுப்பொங்கல் ..என பொங்கலுக்கு அடுத்த நாளை ஒதுக்கி நாம் நன்றிக் கடனைத் தெரிவிக்கிறோம்.

அனைவருக்கும் இனிய பொங்கல் வாழ்த்துகள்

பதிவர்களை வாங்கப் பார்க்கும் தயாரிப்பாளர்கள்

எதைத் தின்றால் பித்தம் தெளியும் என்ற நிலையில் உள்ளது போல தெரிகிறது ..சமீபத்தில் அதிகம் ஊடகங்களில் அடிப்பட்ட அந்த நிறுவனம்.

ஏற்கனவே..அது தயாரித்து..வெளியிடும் நிலையில் உள்ள படத்திற்கு பிரச்னை ஏற்பட்டது.

இந்நிலையில்..இணையத்தில்...வெளிவரும் விமரிசனங்களைக் கண்டு...திரை உலகினரிடையே சிறிது பயம் இருக்கிறது.இதை சில மாதங்களுக்கு முன் தமிழ் சினிமா என்ற இணைய இதழ் தன் தலையங்கம் மூலம் தெரிவித்திருந்தது.அகநாழிகை புத்தக வெளியீட்டு விழாவில் அஜயன் பாலா வும் இது குறித்து பேசினார்.

எங்கே..தன் படத்தையும்..இணையம் விமரிசனத்தில் கிழித்துவிடப் போகிறதே..என்ற பயம் வந்து விட்டது போல இருக்கிறது போலும்..அல்லது நம்மிடமிருந்து எதையோ எதிர்ப்பார்க்கின்றனர்.

திடீரென நேற்று பலர் பதிவுகளில் அந்நிறுவனத்தின் பின்னூட்டம் ஒன்றை பார்க்க நேர்ந்தது..அதில் பிளாக் எழுதுபவர்களுக்கு நிறுவனம் பல வேறு வாய்ப்புகள் அளிக்கப் போவதாகவும்..பதிவுகளை அவர்கள் வலைப்பதிவில் பதிவு செய்துக் கொள்ளுமாறும் கோரப்பட்டிருந்தது.

உள்ளே சென்று பார்த்தால் ..இன்றைய டாப் 10 பிளாக்குகள்,மிகச் சிறந்த பதிவுக்கு அந்நிறுவன விருது,கலக்கல் கவிதைகள்,சினிமா, சிந்தனை என பல பிரிவுகள் இருந்தன.

உண்மையாக அந்நிறுவனம் பதிவர்களை ஊக்குவிக்க இம் முடிவை எடுத்திருந்தால் நம் பாராட்டுகள்..

ஆனால்..தனக்கென ஒரு நோக்கம் வைத்துக் கொண்டு..அதற்காக தற்காலிகமாக..இம் முடிவை எடுத்திருந்தால்...அவர்களுக்கு ஏமாற்றமே ஏற்படும்.

எது எப்படியோ..இணையத்தில் பதிவுகளின் வலிமை அறிந்து மகிழ்ச்சியும்..பதிவர்கள் இது கண்டு மேலும் பொறுப்புடன் செயல்பட வேண்டும் என்றும் கேட்டுக் கொள்கிறேன்.

வாய் விட்டு சிரியுங்க...

1)நோயாளி- (மருத்துவரிடம்) டாக்டர் சளி அதிகமாய் இருக்கு..உடனே கரைக்கணும்
மருத்துவர்-முதல்ல ஒரு ஆபரேஷன் பண்ணிடறேன்..அப்புறம் உங்க உறவு..கரைக்கறது..எரிக்கிறது எல்லாம் தீர்மானிக்கட்டும்.

2)நீதிபதி-துணிக்கடையில நுழைந்து ஒரு லட்சம் மதிப்புள்ள பொருள்களை திருடினதை ஒப்புக்கொள்கிறாயா
குற்றவாளி-75000 மதிப்பு பொருள் தாங்க..கடையில் 25 சதவிகிதம் தள்ளுபடி அறிவிச்சிருக்காங்களே

3)தலைவர் கிரிக்கெட் மேட்சுன்னா விட மாட்டார்..கண்டிப்பா போயிடுவார்..
கிரிக்கெட் மேல அவ்வளவு பற்றா
சேச்சே..சியர்ஸ் கேர்ள்ஸ் ஆட்டத்திலதான் பற்று

4)தலைவருக்கு தமிழ் மேல பற்றுன்னு எப்படி சொல்ற
சிரிக்கும் போது கூட ஹி..ஹி..ன்னு சிரிக்காம கீ..கீ..ன்னுதான் சிரிக்கிறார்

5)என்னங்க..அடுத்த ஜென்மத்திலும் நீங்கதான் என் கணவராய் வருவீங்கன்னு ஜோசியக்காரன் சொன்னான்
அப்போ..எனக்கு திரும்பவும் நரகம் தானா

6)உன் கூடப் பொறந்தவங்க..எத்தனைப் பேர்..
ம்..மூணு சகோதரன்..நாலு சகோதரி..இல்லை இல்லை ம்ம்..
இதுக்குப் போய் இப்படி யோசிக்கறே
எங்கப்பா யோசிக்கலையே..அதுதான்..