(தலைவன் மாலைக்காலத்தில் வருவானென்று தோழி தலைவிக்குக்கூறியது.)
நெய்தல் திணை - பாடலாசிரியர் உலோச்சன்
இனி பாடல்-
கடல்பா டவிந்து கானன் மயங்கித்
துறைநீ ரிருங்கழி புல்லென் றன்றே
மன்றவம் பெண்ணை மடல்சேர் வாழ்க்கை
அன்றிலும் பையென நரலு மின்றவர்
வருவர்கொல் வாழி தோழி நாந்தப்
புலப்பினும் பிரிவாங் கஞ்சித்
தணப்பருங் காமந் தண்டி யோரே.
-உலோச்சன்
உரை-
தோழி , கடலானதுஒலி அடங்க, கடற்கரைச் சோலை மயக்கத்தையுடையதாக, துறையையும் நீரையும் உடைய கரிய கழி, பூக்கள் கூம்பியதனால் பொலிவழிந்தது; மன்றத்தின் கண் உள்ள அழகிய பனைமரத்தினது, மடலின் கண்ணே பொருந்திய வாழ்க்கையையுடைய, அன்றிற் பறவையும், மெல்ல, கூவும்; முன்புநாம் தம்மைப் புலந்தாலும், அவ்விடத்துப் பிரிதலை அஞ்சி, நீங்குதற்கரிய காம இன்பத்தை, அலைத்தும்பெற்றவராகிய, தலைவர், இன்று வருவர்.
(கருத்து) தலைவர் இன்று வருவர்.
No comments:
Post a Comment